貓..

2016.11.04寫

2工貼貼 ，一滴水都毋啉，連伊上愛ê罐頭嘛無欲鼻一下。 中晝轉厝裡，伊無像往過徛佇電腦主機頂頭，看唯窗仔門出來迎接我；我知影，伊抑咧［絕食］。是咧反省伊拍輸野貓？抑是著驚猶未退？敢有人咧共貓收驚？

起哩二樓共看，我樓梯peh真慢，平時仔伊若聽著我ê跤步聲，會走倚來。中晝煞無聲無說，足驚起哩到樓頂，看著ê是一隻貓仔乾。佳哉，覆佇皮椅仔頂頭ê貓仔，舉頭看我。我行倚開落地窗，伊跳落來綴我行倚門邊。哦～閣有力通行，應該無要緊。
就是佇遮，二樓ê陽台；拜三彼暗暗頭仔，貓仔一起哩樓頂，規暝tō無閣落來，有聽著二樓貓仔咧冤家，想講，落地窗關牢牢，極加是參野貓相罵，應該袂相拍。

半暝仔起來便所，無看著貓咪顧佇門邊，感覺奇怪，想講伊大概佇二樓睏去矣。
第二工透早，攢早頓ê時，貓仔無像往過按呢，來灶跤纏咧纏咧，纏甲我共飼早頓、共揉身軀，腹肚飽、毛焦鬆，伊就會乖乖仔佇邊仔耍。
今、樓跤四界揣無貓仔，起哩二樓揣，嘛揣無；聽著阿勳佇樓跤喝：佇遮啦！

應該是身體無爽快..覕起來，我才會佇樓跤看無。
貓仔知影我佇二樓，就綴起哩。夭壽哦！，貓仔頭一空遮大空，空喙邊仔閣一sûn誠長，血已經焦去矣。餳伊落來食早頓，煞一喙都毋食，開一罐伊上愛ê罐頭，嘛無tsùn-būn『不在乎』。
走入去房間勼佇棉被頂頭，毋食！
想講共飼料囥碗裡，枵tō會來食。

昨中晝轉來，飼料一點仔都無減少，貓咪猶佇棉被頂咧ku；飼料提去到伊面頭前，喙攏毋peh開，一滴水都無啉、一粒飼料都毋食..... 昨尾暗仔下班，看伊原位不動khu̍t佇眠被頂，一直睏、一直睏，睏甲我欲睏ê時，想欲共徙位，煞毋hông徙，hm̀-hm̀叫，閣走倒轉來原位。阿勳講予睏無要緊啦！從來毋捌參貓睏共床，睏無啥會落眠，差不多翻點，貓仔行出去矣，起哩二樓，tō無閣落來。
　
一直到今仔日中晝綴我落來，有食幾喙仔罐頭！有食、tō會活。會活，大概tō會tāu-tāu-仔好起來才著！我按呢想。
　
貓仔其實聽有人咧講ê話。
頂禮拜六阿勳參加一暝兩日ê活動，無佇厝裡。逐工暗頭仔貓咪攏會吵欲出去走廊，跳起哩牆圍仔頂懸看外口，一吵起來彼種sai-nai『撒嬌』ê聲調，予人不忍心拒絕伊。

拜六彼暗嘛是吵欲出去，我共伊講：厝裡干但我佇咧爾，汝若閣出去，我毋是無伴？莫啦！汝愛佇厝裡參我做伴啊！
伊頭taⁿ-taⁿ掠我金金看，恬恬仔聽我講了，就無閣吵矣，若是平時仔，無吵甲共開門予出去，是毋放人煞ê。
彼暗，規暝攏佇樓跤，睏佇電腦頂頭參我做伴。

拜三暗會參野貓相拍，應該是想欲共來二樓陽台ê野貓趕走，毋拘伊毋知影，彼野貓個個身懷絕招，欲汰會是伊這隻hông飼慣習ê貓咪會當惹ê？
希望經過這遍ê驚惶，伊會知影...佇這間厝，伊是王，行出去這間厝，伊只是一隻軟汫ê三跤貓！