重陽節

2016.10.08

早起菜市仔強欲kheh袂入去。

tsiⁿ倚去阿桑遐，買一塊菜頭粿。
問阿桑，菜市仔汰會遮濟人？汝物件閣加賣遮濟項？
伊笑笑講：啊tō tiâng-iâng節，汝煞袂記得？明仔載重陽，這馬ê人攏嘛有閒tō提早拜，今仔日毋才會遮濟人。
　　　
聽伊講tiâng-iâng節，是阮故鄉叔伯阿嫂ê腔口，感覺足親切，若像咧參阿嫂講話。啊若阮是講tiông-iông節。
　　　
以早佇故鄉，重陽是大節日，便若有祖先忌日、重陽等等，前一日阮二伯會提伊彼本毋知用幾十年ê手指簿仔，一家一家通知拜拜ê事項。
重陽這工，是咧拜啥？
序大人共阮講
就是這一年，若是有袂記得替已經過身ê祖先做忌ê，佇這一工煮予豐沛豐沛，祖先總呼請。
所以重陽拜ê物件並做忌較濟項，六、七个家庭捧來公廳同齊祭拜，我想，彼時陣阮ê祖先，一定感覺真幸福。
這馬這種大家族仔同齊佇重陽做火拜ê，應該是無濟矣。
　　　
雙親猶佇咧ê時，佇這个節日前後，會聽怹準備欲拜拜、抑是公所送老大人啥物禮物等等ê代誌，今..生活無這款連結，厝裡閣無祀公媽，重陽就變做一个參我無熟悉ê節日矣。
　　　　
拄嫁入來彼年ê重陽，國中時陣ê一个老師教我講，無方便攢拜拜，就去買一副重陽燒ê金紙，轉去參咧燒，按呢嘛算對祖先獻一點仔敬意。
　　　
怹兜ê公媽祀佇二樓頂，樓梯真歹行，我干單空手行tō真食力，無才調共金紙提落去樓跤燒。
大姆仔欲燒金ê時，我請伊順煞提落去。伊應講：免啦！遮ê tō有夠矣。
　　　
後來重陽節，我就無閣轉去拜矣。
離我愈來愈遠ê節日，今仔日...佇菜市仔相tng7【相遇】。鬧熱滾ê菜市仔，我煞有淡薄仔稀微。