2016.06.19寫

拜三暗頭仔leh洗衫ê時，發覺貓咪哪會一直來後壁耍貓仔沙？

酙酌共看，啊！毋是leh耍沙。是尿放袂出來，干焦滴一兩滴仔爾，捷捷放、放無。

後來大概是真艱苦，無入去沙仔ê位尿就滴落來。
伊是真清氣相ê貓咪，一定有問題。

看壁頂ê時間，9點。
敲電話予動物病院。
請伊慢且關門，我去提藥仔轉來予食。
　 
藥仔參罐頭予食（按呢伊才欲食），食了無偌久，貓咪起哩樓頂矣。
我做閒嘛去睏。

半暝仔2點外精神，想講貓咪毋知好否。
出房間門就看著塗跤一撮貓咪吐ê物件。
暗頭仔食ê攏總吐出來矣，看著真煩惱，伊覕佇樓頂，毋知有按怎否。

塗跤清好、拭好，已經3點矣。
想講，閣較費氣嘛著起哩樓頂共看覓咧。

樓梯間仔ê電火切to̍h，叫一聲：貓咪！
無反應。
拄欲peh樓梯ê時，伊落來矣。
啊！是一隻貼心的貓咪呢。知影我peh樓梯無方便。

落來到樓跤。Siān-siān-siān倒佇塗跤。
我共so，伊目睭瞌瞌若像咧感受人對伊ê關心。
So有一睏矣，想講著閣來去睏，第2工愛上班呢。
我就共講：貓咪，我欲來去睏，汝愛平安哦！

入去浴間仔洗手出來，掠我看一下....[喵]一聲，若像咧討欲閣so so leh
想講伊咧無爽快，不忍心放伊家己佇客廳，就閣伴伊一睏仔。
伊去後間仔ê沙仔遐，我才入去睏。

平時仔我早起時起來，房間門一開，伊就跳起哩共爸爸耍耍咧，才出來等我ê飼料；拜4透早貓仔煞無落來。我哪攢早頓哪向樓頂共叫。無聲無說，是按怎啊？哪想哪驚，就撥工起哩共看。
伊倒佇落地窗頭前有風ê所在，掠我看一下，無意思欲落來食早頓。

交待彼工免出門ê阿勳，貓咪若落來，愛用予食，我欲出門ê時，貓咪落來予我看一下，又閣起哩樓頂矣。真正是貼心ê貓咪呢，予欲出門上班的我知影伊猶平安。

人咧上班，心佇厝裡。
工課做一坎站，用Ｌｉｎｅ問阿勳，貓咪有食否？
阿勳工課咧無閒，倚11點才共我回。
貓咪叫袂落來，汝轉來才用予食。

看伊按呢回，我開始坐立難安。

我捌有尿放袂出來ê症頭，彼是真痛苦ê經驗。我想，貓咪一定嘛足艱苦。

提早下班，轉來到涼亭仔跤，貓咪無像以早按呢，佇窗仔門邊等我。
阿勳看我轉來，講：「吼！我頭殼gông ê 時汝嘛無遮要緊！」
講彼！
這个時陣無想欲參伊爭論。

貓咪這時陣落來矣。
用予食，在來誠重食ê貓咪，竟然無啥愛食。

尿，嘛是放一兩滴仔爾。按呢敢著？想講醫生叫我藥仔予伊食3工看咧才閣講。

尾暗仔下班轉來到厝。阿勳講：無掠去注射若像袂使得哦！
我想嘛是。

兩人舞一睏，阿勳ê手予貓咪抓幾仔sûn，流血流滴，我嘛予伊ê瓜鑿甲血直直流，無共伊掠入去籠仔內，就無才調tshuā伊去看醫生，兩个人攏無要意手裡ê血，伊遮呢青驚，下力反抗，看著實在毋甘啊！

後來佇伊慘叫聲佮阮兩人大粒汗細粒汗之下，總算共伊掠入去籠仔內。
伊是無膽ê貓咪，一路喵喵叫，路裡ê車咻咻叫，貓咪實在足可憐。

醫生共伊注2支射，講若無改善，就可能是結石，著送較大間ê動物病院。

佳哉！總算看著伊大pû大pû咧放尿矣。

捾一包重重ê貓仔沙去掞ê時，感覺....從來毋捌掞貓仔尿掞甲遮歡喜！