第1回手搖車行遠路　　

2016.06.12

從報名參加「手搖車體驗營」，就開始幻想，一定是真讚ê旅途。
紮一台電充飽ê相機，佮一支手機仔，想講….手搖車涼涼仔搖，…古坑美麗ê風景，一定翕袂少。
　　
誰知影….
風雨帶來參夢想完全無仝ê古坑之旅。

早起時為著欲予大家熟悉操作的感覺，佇附近石龜社區踅，去看傳統做豆油ê所在。禮拜無做，豆油芳味無歇睏，連我過敏ê鼻仔，嘛鼻著古早豆油ê芳味。

　　
閣去看用ひのき「檜木」建造ê米絞，聽講欲七十年矣。頭家講，用這款機器絞出來ê米，好食閣健康。一直用力吸空氣，想欲鼻寡仔ひのきê芳味；可惜，這時陣我ê鼻仔罷工。
　　　
食晝飽，一隊十外人ê車隊向古坑直行。
雨有時大、有時細，手機仔佮相機攏毋敢提出來翕。干焦會當將路邊媠媠ê風景，記佇腦海中。
　　
我是生手，起崎落崎變速ê時機，已經真細膩矣，嘛是脫箠。雨當大，一个起落崎ê所在…落鏈矣。
阿彌陀佛，佳哉騎鐵馬仔隨隊ê少年家，隨替我排解。
　　
繼續向前行，頭前ê車隊已經走甲無看影。身邊偆三、四个隊友，雨真大，佇十字路口毋知欲正越抑是倒爿行？
有人tshuā頭越正手爿，無偌久看著車隊歇佇路邊廟仔遐。
　　
規身軀已經澹甲足徹底，鐵鞋內底跤浸水。愈歇愈寒，才對阿勳遐提出來紥來ê雨幔。幔燒ê嘛好！阮按呢想。
　　
總算體會著雨中騎車ê滋味。若毋是有伴，汰敢佇遮大ê風雨騎車？真多謝一路辛苦陪伴的工作人員。

在停車場....禮成..散會了後
理事長叫我共一台車騎去媽祖宮附近的協會囥

伊tshuā我向這爿行...掠準是欲行橋跤的路
到橋頭前才喝講...起哩哦！
啊？！...欲叫我- - [過橋]啦！

彼斜度對我來講，有淡薄仔驚
無志工佇邊仔，足驚tiâu咧佇橋中央
　　
無幾秒的時間通考慮
所有學過的步數佇頭殼內快速Run一遍
嗯...變速囥佇低速檔...電力調去第4格
［倒手放開！］上重要的是這句話

定定予騎機車的習性牽牢牢
倒手若捏咧欲搝擋仔的位置，電力斷去...穩tiâu車的
理事長是咧共我考試hioh？

對古坑轉來偆一點點仔氣力
拚落去
這條橋。我行過來矣

畢業證書，大概提著袂面紅才著
　　
汝若問我好耍否…我共汝講…足好耍ê
毋拘，若我是袂堪得siuⁿ耍。
　　
轉到厝，身軀淡，行李嘛攏淡ê。
暗頓食飽，衫仔褲落落去洗衫機了後，目睭皮一直毋聽話。
想欲去睏，壁頂ê時鐘一看，嘛才七點外。
我共阿勳講：欲來去睏矣；袂使共我笑哦！
伊講：予我笑一下抑要緊。其實…袂bái矣啦，嘛才落鏈一擺爾。
　　
錯誤中才會當學著正確ê方法。這是這遍參加體驗營上大ê體會！