茶米茶

2016.05.05寫

泡一泡茶米茶，斟入去玻璃杯。 腦海中浮起阿爸講伊上愛琥珀［hó͘-phek ］色彼句話。 　

阿爸愛泡茶。 二姐的查仔囝細漢時，欲啉阿公泡的茶，講是：阮欲啉紅紅的滾水。予阮共伊笑甲這當今。

臭生同學怹囝細漢時，tshuā【帶】來厝裡參阿爸坐。 聽講大人捌共囡仔創治，舀茶盤內底的茶尿予啉，囡仔人毋捌，啉甲真歡喜。

這馬彼个囡仔嘛變大人矣。是阮同學翁仔某的心肝仔寶貝。真gâu讀冊，敢會參啉茶尿有關係？

爸母年老的時，阿爸會佇五樓頂泡茶，泡了，捧一杯仔落來四樓予伊呀。阮攏感覺；年老時的阿爸，對伊呀比少年時較好。 　

會記得參怹坐火車去阿里山彼遍。 遐是有一个假期，爸母予阮小弟仔載來斗六，阿爸講伊想欲去坐阿里山的火車，少年人有其他的行程，無閒通陪伴，彼時阿爸行動猶真扭掠，講家己行無問題。坐火車去阿里山是伊多年的心願。 阿母毋甘伊家己去，就講伊嘛欲去。 兩个老人欲去坐火車，我閒閒，嘛綴去。

 阿里山的火車行足慢的，火車路路邊的花草看甲足分明。一路，阿爸介紹花草予我認捌，嘛一直唸講：翠容無來，真無彩！咦？遐濟查仔囝，是按怎干單念大姐？大姐是一个真浪漫的大姐，真愛青翠的植物。大概是參伊細漢時，阿爸佇埔里替人接栽仔，大姐做阿爸的助手有關係，山野美麗風景的記持，定聽阿姐講起。

火車行真久，腹肚枵矣。阿爸對揹仔內底提餅出來欲食。 提一塊，問伊呀：汝欲食否？ 伊呀講：無愛！ 伊呀的回答，熟似甲予我驚一下，彼是我欲提物件予阿勳食，伊句無鹹無汫的應話：無愛！ 時間過了真緊，爸母攏做仙矣。

　 阿勳彼句：無愛！我嘛真慣勢矣。

我會繼續問….汝欲食否？！ 你欲啉茶米茶否？…………………

哈！其實今仔日我無問伊！