伊呀！阿爸..阮來看恁哦

2016.04.13寫

昨下晡咧上班，接著二姐的電話；一定有特殊的代誌，伊才會佇這時陣敲電話。
問伊佇佗？
講：佇恁兜遮的溪仔邊咧看風景。
我講厝裡有人，叫伊去厝裡等我下班。

伊講早起時去樹林仔看長輩，佇火車頭看著往斗六的火車…就來矣！

我講早起欲請休假。伊講莫啦，無想欲影響我上班。
啊假tō有咧！

我講…咱來去揣伊呀！
伊講…好哦！我嘛捌按呢想。

車、阿勳開出去。我騎我彼台戰車---oo- too-bai2，載二姐對斗六出發，往社頭直行。
哪騎哪開講，騎足慢的。
二姐按算欲佇中晝進前坐火車轉去。
看我騎遐慢，大概驚仔時間會拖siuⁿ晏，問我講..一向騎車攏騎遮慢hioh？
無啊！鼻著路樹的芳味，毋甘騎緊；好！huānn予好【扶好】，緊速向前行。

其實阮兩个攏毋知路草，我講無要緊，阿爸、伊呀會共咱tshuā【帶領】。
到社頭市區，青紅燈跤問一个騎機車的過路人，有設塔彼个公墓按怎行。
伊講：綴我來。我報汝行。
看伊機車頭前有吊菜，應該是去菜市仔買菜的款，為著欲報阮路，一定是加行真遠，庄跤人報路，就是遮呢熱情。

果然、雙叉路正斡，就看著矣！

塔位佇山區，這台行八萬外公里的舊車，雖然起崎有淡薄仔食力。毋拘嘛是順利到位矣！
父母安歇的所在，景緻清幽。拄欲提手機仔翕相，大滴大滴的雨落落來………!
這陣雨，來著遮呢奇妙。若較早落一時仔，阮會袂赴穿雨幔。
覕佇樹仔跤，共雨幔穿起來；嘛是欲翕一張仔相！（就是這張）

問二姐敢欲起哩塔裡看伊呀佮阿爸。
伊講免啦，伊知影咱來矣！

停一時仔，回程！

趕中晝進前上北火車的車班。送二姐轉去桃園。
家己一人佇雨中騎車，內心有講袂出來的滿足。

當思念父母的心思強欲溢出來的時，毋知佗一支無形的手，安排二姐來解阮的相思！
感謝上天所有的安排。