寄藥包仔

2016.03.17寫

佇電視劇內底，去看著- - -會記得阮講是【寄藥包仔】。
從我抑未捌代誌以前，阮厝的壁頂就有這矣
內底有真濟種藥仔；我干單會記得胃散佮萬金油。

記持上深的，就是胃散。食著涼涼，略仔hiong-hiong【這个字.我毋知華語欲怎講，毋是『辣』】，會記得貯胃散的罐仔，像一个有腰的小姐，阮足愛耍彼个罐仔。彼个年代少人有四秀仔通食，阮會去提彼罐胃散來食、食了通耍罐仔。

啊若萬金油，就有一段我真歹勢的往事....

彼是一个風颱天的尾暗仔時，暗頓食飽，風咧透、雨咧落。伊呀叫阮去睏，伊欲趕雞仔鴨仔去寄二姆怹兜，因為阮兜的雞牢仔較荏【不夠堅固】，二姆怹兜个雞牢仔較勇，驚雞仔、鴨仔予風吹走去，就愛趕去寄人兜。

彼陣仔我參兩个阿姐佮哥哥睏中間仔總舖，阿爸、伊呀佮阮小弟小妹是睏房間。

會記得等足久的，等甲逐家攏睏去矣，伊呀猶未轉來....
我愈想愈驚，是按怎伊呀無轉來，哥哥佮姐姐哪睏會去，閣睏甲遐落眠。

彼隻風颱無大隻，毋拘厝後的竹bôo隨風搖，發出kiⁿ-kiⁿ-koāiⁿ-koáiⁿ的怪聲，愈聽愈驚，阿母毋知會去予歹人掠去未？想想咧，煞驚甲哭出聲。

房間的電火hŏng切to̍h【打開】，阿爸行出來，問我哭按怎？
我毋敢講，等無伊呀！就講腹肚疼（足戇的，彼陣仔哪毋敢講實話？）
阿爸伸手提壁頂彼包藥包仔，提萬金油共我so腹肚，了後阿爸就閣入去睏；
我細漢的時，暗時仔定定喝講：外口有人挵門、灶跤有人動鼎灶；聽著我咧喝，攏是伊呀起來切火、開門予我看；無啥！緊睏。
這暗是阿爸出來看，一定是伊呀猶未轉來；我按呢想！
我毋敢問講，伊呀哪猶未轉來？

因為本成就毋是腹肚疼，是哭伊呀猶未轉來；哭的原因無消失，閣忍耐足久、足久，閣驚甲哭出來.....
嘛是閣阿爸出來....真濟年矣，我袂記得阿爸是毌是有提藥仔予我食。
干單會記得
閣等、閣哭！
上尾一擺
....伊呀對房間行出來
啊！哪會按呢？
我敢毋是一直攏精神咧等？阮厝房間無後門ah，伊呀是當時轉來的？
的確是我睏去，家己毋知影，掠準伊呀無轉來。
哈！真戇。

看著藥包仔，想著這！

這馬攏講過期的藥仔毋好食，彼陣仔，真久才有人會來巡一遍藥包仔，有用去的、收錢、補藥仔。無用的，若像攏繼續下佇藥包仔內底，欲汰有過期的問題？！