這隻貓
2016.03.14寫

這隻貓咪，舊年四月中旬去動物病院領轉來ê，聽講彼時伊才一、兩個月爾。算算咧，這馬嘛欲度晬矣。
拄掠轉來的時，真kiap【纏】人，阿勳咧做穡、咧耍電腦，定定爬起哩伊身軀纏牢牢，想講….按呢是欲按怎做穡啦；想袂到愈大隻煞愈孤老【ko͘-láu孤僻】，這馬若毋是貓咪家己來倚咱，咱若欲抱伊，伊走假若飛咧！ 
　　
我下班機車騎入來走廊，伊就跳起來窗仔門邊［貓貓］看，驚伊走出去外口紡見去，阿勳會去後間仔叫貓咪去食飼料，若無、就是我共大門關起來，才開客廳的玻璃門。
成年來，就是按呢參伊［舞豬舞狗］..其實是舞貓。
　　
今仔日中晝我轉到厝，機車停好，開玻璃門ê時，有看著阿勳leh倒飼料準備欲飼貓。這隻貓真饞，若有食ê，伊就專心佇遐等。
汰知影伊今仔日心意改變無giàn食，門開一縫仔爾，伊對後間仔無幾秒鐘就衝到頭前，傱出去矣！
　　
去參隔壁彼隻烏狗佇巷仔lòa-lòa-sô【閒逛】，用伊上愛的飼料嘛餳袂轉來。
我有一、二十分鐘的時間睏中晝，倒佇眠床，三條歌聽了抑未入眠。
想講，貓咪若chŏaⁿ【自按呢】無去，阮的心情欲按怎面對？
　　　　　
會記得阮阿爸捌飼一隻鳥仔，關佇鳥籠仔底，我若下班會去佮伊耍耍咧。
有一工下班，鳥籠仔空空，鳥仔咧？
阿爸講，欲下飼料予食ê時，飛出去矣！
我看對懸懸ê天頂，問講：飛去佗位？敢會轉來？
阿爸嘛真毋甘…
毋拘伊共我講：咱leh共飼ê時，真心對待、伊若選擇離開，咱嘛無話講。
　
想著遮ê話，回想成年來，咱敢有對貓咪無真心？無呢！
貓咪漏屎吐、皮膚無好..雖然真歹掠伊，咱嘛是想盡辦法tshuā【帶】去病院看獸醫，注射飼藥仔….。雖然無虧待伊，毋拘伊若是走無去，一定會真艱苦。相機、手機仔佮電腦內底貓咪所有ê相片，的確毋敢閣去掀來看……
想到遮，睏袂去矣，…
　
去冰箱提彼包芡芳用ê魚脯，出去揣貓咪
果然臭臊是貓咪ê最愛，看著我手裡ê魚脯，就倚來欲食…
掠著矣！毋拘伊真重，我掠袂轉來。
一路掖魚脯，伊綴一尾一尾ê魚脯…轉來矣！
　
敢講、流浪是貓咪ê天性？
臭貓咪！害我中晝無睏。
是講…
若是有一工，貓咪來離開…我愛按怎面對？
敢有法度像阿爸講ê按呢
鬥陣ê時真心對待..離開ê時心中無掛礙？
大概誠困難吧！

早知如此絆人心
何如當初莫相識