茄仔色

2016.04.26

這蕊茄仔色ê花，是佇一座天橋跤附近翕ê。
天橋下跤有一擔甘蔗擔，兩个婦人儂咧賣ê，閣有一个穿制服ê囡仔，是國中資源班ê學生仔，認真咧鬥整理削落來甘蔗ê ha̍h-á，塗跤掃甲真清氣，物件排甲真整齊；這種囡仔做代誌ê特色，就是做滿每一个動作，絕對袂偷食步。 

一包一百箍ê甘蔗，量siuⁿ濟我食袂了，囥久會pháiⁿ去。
我攏會問伊：敢會使pheⁿ一半予我，我買50箍就好！
：『好！50塊是吧？』
買幾偌遍矣，攏是按呢。
我用台語問、怹用華語回答我；敢會是新住民？
若以早，我會建議怹講台語。這馬，我咧學習尊重每一个人的無仝款。
我講、伊聽有。伊應、我知影！
按呢就好矣。

甘蔗買了，繼續對市區去踅。
停佇一个菜架仔頭前。
：「姐仔，汝哪遮久無來買？」
我毋是無來買。是定定對遮過，看伊覆佇桌仔咧睏，無共叫。
伊少我成十歲，行動無方便，阮這个沿的致著小兒麻痺算是命，看著少阮遮濟歲，嘛帶這个症頭，攏會感覺：汝若會遮衰？

阮出世彼幾年仔時行ê病，是因為醫學無發達，了後逐个就真細膩，會張持注預防射ê代誌，汰會閣著啊？敢講…嘛是命？

伊免攑枴仔，顧一擔菜架仔。人客若欲挃啥菜，家己落去揀，提予秤。
我無方便落機車，若欲共買，伊著提予我。
所以若看著伊咧歇睏，無看著我ê時，我就無倚來共買。逐遍攏會共我講：汝嘛較捷來共我買咧！

汝賣我菜、無趁啥加予汝費氣。…這句話我無講出來。

寒人天氣閣較寒，伊抑是褪赤跤。問伊汰無愛穿鞋仔較燒？
講穿鞋仔行路袂穩，定定會跋倒。
莫怪看伊面裡定定有傷痕。

會記兩三年前，我嘛是買一包甘蔗了後，來到伊的菜架仔遮。
伊看著甘蔗，共我講：這甘蔗賣我好否？汝才閣去買。
伊講伊足想欲食甘蔗，無人鬥顧店，走袂開跤。

這一日我甘蔗買了，又閣踅對遮來
：「甘蔗請汝食！」
伊講袂哺矣。
喙齒歹了了。
共我講：人講無眠較會歹喙齒，若像有影呢。我一日睏無三點鐘！
我講..有歲矣齁？毋通按呢對待家己的身體啦！
伊講欲倩人來鬥做矣啦，若無…錢趁會著、驚仔開袂著哦！

歲月的痕跡，刻佇所有的物仔。
才兩三年爾，愛食的甘蔗就袂哺矣！

這蕊茄仔色的花，閣較媠，嘛才得著一日奢颺的生命。