 
字體：小 中 大 |
|
|
|
| 2017/12/07 09:49:54瀏覽40｜回應0｜推薦0 | |
| 麵粉粿仔 2016.04.03 細漢時有一遍因為灶跤厝頂予風颱攑走，會使去領麵粉轉來煮。 阿爸利用落雨天包水餃予阮食，水餃皮就是用麵粉家己撋的。 真愛阿爸佮阿母兩人佇灶跤咧煮食的氣氛，怹會參詳欲怎下料等等...嘛表示彼時陣厝內大細平安；才有心情變食的。 水餃食過了後，阿爸講另工若落雨，欲煠麵線予阮食。 自彼日..我就一直等落雨！ 後來等無阿爸煠的麵線，因為抑未落雨，阿爸就去台北揣頭路矣... 雖然後來搬去台北了後，阿爸定定煮好食物仔予阮食；我猶是咧等故鄉灶跤阿爸煠的彼碗麵線。一定真好食！ 阿爸捌共阮講伊讀二林初農的時，有一遍老師叫阮阿爸騎馬仔去彰化揣人辦代誌。 馬仔騎到彰化是倚晝，主人家煮清米飯請阿爸食晝；彼个年代較濟人攏是食蕃薯簽飯，清米白飯是真稀罕的食物。 拄咧食晝的時，飛機來掃射，逐家走去覕掃射；倒轉來的時，彼碗飯去予掃射kō-lah-sap『弄髒』，袂當閣食矣 雖然後來經濟較好，清米白飯欲食偌濟嘛無問題。毋拘阿爸講，彼碗食無著的清米白飯，一直囥佇伊內心...一定誠好食！ 阮阿勳咧學師仔『學徒』的時，有一站仔真想怹阿母煮的麵粉粿仔。真無簡單放假幾若工，坐車轉來厝裡歇假，真想欲食一碗仔麵粉粿仔；毋拘彼時灶跤已經是大嫂咧使用，伊歹勢共大嫂講伊想欲食麵粉粿仔，一直等、一直等，等看阿嫂會煮一頓仔麵粉粿仔來食否...結果等無，帶著失望的心情閣去學師仔...內心一直咧思念阿母煮的麵粉粿仔...一定足好食！ 過年了後倒手肩胛頭酸疼甲逐工著食止疼藥仔過日子。 想著袂當煮伊愛食的麵粉粿仔，就去外口買轉來食。 外口買的，並毋是歹食；是食袂貫勢。連我都袂愛食外口買的麵粉粿仔。 阮阿爸阿母年老的時，厝裡若無人轉去，怹攏食電鍋飯；一个電鍋炊飯兼thn̄g菜。 我愈來愈知影....食電鍋大餐的日子一定會來。 最近酸疼已經較好矣，趁放假；煮一頓仔麵粉粿仔來食。 |
|
| ( 心情隨筆｜心靈 ) |
