堪忍的疼

2016.03.11

昨暝食暗頓順煞共一休和尚的卡通看了，緊去洗碗箸，家事做煞。坐佇電視前，準備欲看『愛的萬物論』；最近愛看這个節目，佇短短一點鐘內底，會當看著...咱看起來若像本成就真幸福的翁仔某，其實大部份攏行過一段人生的困苦。

等甲8點外，咦？哪等無。這个節目是拜1到拜3暗時八點做的。
問阿勳，今仔日是拜幾？應我講拜4。

哪會按呢？敢毋是拜二、三仔爾？

大概是止疼藥仔食了，袂記得疼，連日子嘛袂記得過矣。

最近逐工攏著食止疼藥仔才會當生活四序。
毋通共我講…按呢對身體無好。
因為我知影…
除非我會當莫舉枴仔

過年前，倒手片肩胛頭就開始酸疼。
對長期舉柺仔的手，酸疼已經無啥通驚惶，攏是忍一站仔，就好去矣。若毋是忍袂牢，真少揣醫生，因為疼甲已經會曉做醫生。

過年了，疼無較好，連頭前pín-á-kut【肋骨】嘛疼，閣忍！
疼甲頷頸了後，閣若像欲爬起來到鬢邊矣
毋著…閣疼落去，敢會死咧？
死、總著來去病院領一个病名！

以早酸疼定定去揣曾醫師。伊現此時去佇外地做院長，一禮拜轉來看兩早起的診。
真久無看見，伊哪問病情、哪問我厝裡好否！是一个真親切的中醫師。
診斷講，是使用過度引起的酸疼；佳哉無『沾黏』。
我問伊…汰會疼甲遮濟位？
伊講..疼會湠開！
原來…
疼規世人，攏疼無到夠功夫；這遍才認捌疼的功力….會湠開！
既然是因為疼湠開，毋是啥乜大問題。按呢，就免共這个病名領轉來矣！
逐工認真去病院報到。
毋拘…因為時間的關係，無法度逐遍攏予曾醫師看。

看成禮拜，共醫師講：若無食止疼藥仔，猶是疼呢！
醫生應我講：啊汝都攏咧舉柺仔啊！

聽著這句話，我知影，醫生只是歹勢共咱講：汝無藥醫啦！

閣來，無閣去揣醫生矣
佇厝裡家己『熱敷』、貼膏藥、ù超長波….閣有；貧惰煮飯！
比逐工去hông鑿五、六針兼『拔罐』，有較贏、無較輸。

聽講真濟『共殘黨』的朋友是食止疼藥仔過日子。
是講…敢會像我按呢...食甲共日子紡見去？
人用『度日如年』形容日子歹過；照按呢看，我日子猶真好過咧，過甲毋知拜幾呢！

堪忍的疼；嘛算是平安啦！