痱仔粉

2016.02.26寫

相片倒手爿彼罐，是我阿娘替我攢ê兩罐痱仔粉其中ê一罐。另外一罐是青色ê，有貼一liâu-á【條】紅紙，因為……是嫁妝。

嫁妝kah痱仔粉；毋是風俗，是我需要。

講著痱仔粉，tō愛講著香港跤。

國校仔四年級ê時，1遍歇睏日，寢室內底1个五年級的學姊招我去耍水。佇浴間仔內底，kā水làu規水池仔，參學姐兩人耍一下晡，耍甲手指頭仔皺皺、白白，有淡薄仔驚人。

耍了，入來寢室，學姐是外省囡仔，用『國語』共我講：『對不起！我要跟妳講一件事；我有香港腳。』
彼時，我猶毋知影伊有香港跤，是按怎著共我講對不起。
日子一工一工過，免偌久，我就知影伊ê意思矣。

因為…我無去過香港，煞有一个香港跤。

上課ê時是穿鐵鞋，跤癢起來有夠費氣。鐵鞋kah ê皮鞋真厚、真tīng【硬】，抓袂著癢ê跤，著用枴仔去khà【敲】跤才會略略仔止癢；其實應該毋是止癢，是柺仔khà著跤會疼，予咱袂記得癢。

歇熱轉去厝裡ê時，香港跤腫甲若一粒麵龜，金熾熾的跤盤，繃甲強欲piak開，人閣發燒。
阿爸囡仔飼濟ê，著有檢傷分類ê本領；伊知影這有嚴重！鐵馬仔騎咧，載我去看醫生，醫生講若會囥甲按呢才來？愛注射、食藥仔。
這馬想起來，就是變做『蜂窩性組織炎』啦！
　
仁愛學校佇和美郊外，彼个年代，遐四箍圍仔無啥建築物，干但田中央這間學校，是一个真稀微ê所在。寒人對寢室開門出來，隨搧著冷吱吱ê海風。
循環無好ê跛跤，佇這个季節會著得一个大禮物，就是『凍瘡』；一粒一粒烏烏若粒仔，天氣若反燒熱，會脹疼，到熱人就結疕，留落來一tah一tah的粒仔khî【疤】。一般行動愈無方便的人，『凍瘡』會愈嚴重，大概是參循環無好有關係。
寒天的『凍瘡』舞了，就換熱天的香港跤來揣咱。團體生活，真少有人閃會過這个症頭！

國校仔六年的時，聽一个老師講，跤若保持焦燥，黴菌袂活，香港跤就會好去！

彼陣仔開始，若欲穿鐵鞋，就會佇跤指頭仔縫糝痱仔粉，保持焦燥，有影哦、閣來就毋捌有香港跤嘍！

出門過暝，行李內底一定愛紮一罐痱仔粉；阿母知影我的需要，所以佇我欲出嫁的時，就替我攢［一對］痱仔粉！
　
相片正手爿彼罐，就是最近新聞咧報導，會致癌，得著賠償24億彼个牌子。
我用這个牌子真久矣，因為大罐較有額；假使若因為按呢來致癌；我無怨嘆！因為穿鐵鞋的歲月，伊解決我真大的問題；毋但予香港跤袂來揣我，家己袂曉震動ê正跤指頭仔，嘛因為有痱仔粉，袂因為流汗黏咧，感覺焦鬆，心情tō輕鬆！