認識一位樹人大老，屬元老級，為人老實有內涵，愛面子，聰明過人，精明有餘，頗有藝術天賦。于樹人高層派系中他算是溫和的鴿派，亦是唯物主義者，有著一般人的根本煩惱，心常牽掛成敗，夜深人靜患得患失。我就欣賞他那份清高、自命不凡，他喜歡我的戆居和我寫的東西，所以有事無事都打電話逗弄人家，吃吃他的豆腐。

  手機傳來大老那把渾厚的嗓子：「喂，邊位？」

  「契爺，您好！」

  「啋！我唔係你契爺，邊個做你契爺實前世唔修！」「好想問吓你，點解係都想認人做老竇、契爺呢？」

  「冇嘢，只不過想在加州揾個靠山，有你大老撑腰實冇人敢烚我。」

  「揾靠山？哼，揾老襯就有！」「你個奸仔唔係有咗肥婆蓮同保亞咩？還有阿Đại嗰班大神呢？」

  「係就係，如果加埋你就成風塵三俠做我護法，雙魚更加如虎潻翼，落到洛省邊條粉腸夠胆郁我。」

  「呵呵，你都識驚呀？怪不得唔敢來加州，阿Tê兩公婆等緊你過來呀，重有阿小嬌，死啦你，哈哈哈。」

  「嘻嘻，估唔到契爺住嗰度咁多仇口、冤親債主，深入危邦之地要多個心眼，小心駛得萬年船。」

  「原來阿英係冇胆趙子龍，大隻講，得把口。」

  「係呀、係呀！我好驚、好驚~呀。」「契爺好×衰，專門窒人，我個玻璃心好脆弱，受不得刺激嘅。」

  「我冇窒人，係有人冇胆唔敢來加州，成日匿響地下室，成隻井底蛙咁。」

  「喂，勸君勿睇小呢隻井底蛙，第日中張六合彩你就知，一石激起千層浪。」

  「兩千幾年前有人坐響棵大樹下邊入定，瞰就見到成個宇宙，三千個大千世界，二十八層天。」

  「今時有隻井底蛙踎響地牢無限上網，見到你哋班友沉迷於生死海，日夜造業生煩惱、搞輪迴、搞名聞利養、貪著五欲六塵. . . 」

  「都唔知你嗡乜。細佬，做人要及時行樂啊，得閒出去行吓，出邊咁多靚女，睇吓呢個花花世界，享受人生，唔好匿響屋企度。」

  「屌，你係識講人哋，專門攞自己心中把尺來做標準，你又唔出去行吓，成日黐住個部落格媾女。」「你係退休人士，有大把時間，你有車，重行得、食得、痾得，×得，又有大把銀；契爺，你話過做人要及時行樂吖嘛，遊埠旅行記得帶埋偉哥呀。」

  「衰仔，咪亂咁嗡，成個細路仔講埋唔三唔四啲嘢，重咁大聲。」

  「契爺，呢啲叫做關心！響加州從南至北有咁多樹人徒子徒孫，竟然無一人來關注探訪，搞到契爺孤伶伶一個人流落於公園，諗下諗下都幾淒涼，不知不覺我眼濕濕. . . 」

  「我要出去睇醫生，唔得閒同你個衰仔講廢話。」「下次再傾過。」

  「Oh shit，契爺又要睇醫生，煩惱無根日日生呀。」「喂，到時分身家我都有份啩？記得呀，多謝老竇！」

  「哈，發夢呀你，嗡得出就嗡，真係服咗你。」

  「Okay，得閒再傾，祝您好運！」

脫稿2015年  仲夏 紐約

(雙魚阿英于南加州)