 
字體：小 中 大 |
|
|
|
| 2018/06/06 14:47:53瀏覽71｜回應0｜推薦0 | |
2018.02.18寫 倚年，大姐的身體無四序，連行去予醫生看的氣力都誠勉強，阮攏誠替伊擔心。 二姐將工課暫停，去照顧姐姐，小弟仔阿維蹛姐姐厝附近，會定定去共巡巡看看咧，遠路無去看姐姐的小妹仔佮哥哥，嘛不時拍電話關心；姐姐講，一定欲好起來，姐妹仔通聚會。 過年矣，二姐的厝整理甲誠整齊，貼相片佇賴的群組裡邀請逐家去怹兜𨑨迌。 我看著誠想欲去，毋拘，想著頂tsuā去台北坐火車的經驗，快車的車門歹轉踅，參阿勳兩台電動車塞佇通路口，予其他的乘客誠無方便。區間車的車門好出入，毋拘長途坐慢車，會坐甲掠狂。 總是，阮出去遠路無方便，姐姐知影！ 初一下晡接著大姐夫的訊息，講是佇路裡較暗會到斗六。 咦？姐姐敢有來？ 有！ 二姐開車，載大姐夫佮大姐來遮過年。 看著姐姐會當來，歡喜甲袂曉講，雖然姐姐身體猶是誠虛弱，會當遠路來到遮，是伊體諒阮無方便出門，愛惜阮的心，予伊有出門的力頭。彼暝，毋敢像往過按呢講透暝，因為姐姐著歇睏，睏佇大姐佮二姐身軀邊，阮就真滿足矣。真感動、真多謝！ 今仔日，家族的群組內底，哥哥、阿嫂、二姐佮阿維，佇大姐怹兜啉春酒的相片，雄雄看著相片內底有阿爸的身影…. 彼是哥哥啊！汰會愈來愈成阿爸？ 哥哥講，有影足成，有時陣照鏡，嘛會看著爸爸！ 無毋著，爸母雖然已經離開，咱卻定定會看著怹的形影；看著哥哥佮阿維，若像看著爸爸。看著二姐，若像看著伊呀！ 大姐佇群組寫講：多謝恁來予我看！ 我嘛欲講：多謝恁來予我看，而且重倍的多謝！ 有爸有母初二三，無爸無母頭擔擔。 無爸無母的阮，只有萬分感謝爸母感謝天，予阮的生命充滿予人疼惜的歡喜！
|
|
| ( 心情隨筆｜心靈 ) |
