 
字體：小 中 大 |
|
|
|
| 2018/01/10 23:30:10瀏覽262｜回應0｜推薦6 | |
袂行的跤，循環bái，拄著這種烏寒的暗時，若像紮一支枝仔冰入去棉被內底。跤本身無袂生熱度，只好用冷氣機的燒氣，共房間烘燒，好落眠。 軁入去有燒氣的棉被底，當欲睏。 門口貓咪的叫聲，sai-nai（撒嬌）又閣可憐。 佇棉被底愈聽愈毋甘，我知影，我若起來，共伊抱一下、so一下，囥寡仔飼料佇貓仔碗，伊sai-nai一下，食了，就會去睏。 但是，外口寒sih-sih，若欲起來，著閣tha̍h大領裘仔、穿厚襪仔…. 咧躊躇的中間，伊的聲無停過。 我想，我若無chhap伊，伊應該會誠失望。 門一開，伊就跳起來予我抱，嚨喉發出咕嚕咕嚕滿足的聲音。 這時陣，又閣想起蔣勳大師講過一層伊當初飼狗的因緣。 一个寒人的透早，伊佇八里的淡水河邊散步，聽著狗仔囝佇涵空咧哼的聲，聽著第1聲，想講，毋通斡頭，斡頭會誠費氣；繼續行。聽著第2聲，有淡薄仔不忍心，毋拘嘛是提醒家己，莫斡頭，斡頭會予家己誠麻煩。聽著第3聲，忍不住，ànn落去共狗仔囝掠起來。 幾何年來，狗仔生湠成群，逐工攏咧煮雞肉予狗食。 有人共伊講，狗仔予汝咧照顧。伊講毋是，是狗仔陪伴我過生活。 會來阮厝門口食飼料的貓，有4隻，有人共我講，彼貓上無情，有食伊就來，無食伊就無愛chhap汝。 我是按呢想，咱咧共飼、共惜的仝彼時，已經得著感情的安慰。另工，伊有較好的所在，若走去，雖然會毋甘，總是，咱祝福伊！ |
|
| ( 心情隨筆｜心靈 ) |
