 
字體：小 中 大 |
|
|
|
| 2017/12/12 17:01:31瀏覽234｜回應0｜推薦4 | |
厚沙屑 2017.09.27 盈暗讀冊會有講著［厚沙屑］
這句話，共我捒倒轉去細漢時陣的記持 彼時應該是四、五歲仔 小妹仔已經兩、三歲 我生做瘦瘦，強欲hoa去的形，阿爸去買愛兒菜轉來予我佮妹妹食。 小妹仔食無偌久，就變做一个膨皮膨皮誠古錐的查仔囡仔。 我、一點仔都無去吸收著愛兒菜的效果；猶是瘦甲若像小妹仔的妹妹。 農業生活的暗頭仔，誠閒。 蹛庄內我的表叔佮參阮蹛仝正身護龍的阿伯 怹會來阮厝裡參阿爸開講 會記得彼暗，阿爸共我抱咧，伊的跤搖咧搖咧，我細漢誠歹育飼（大漢了嘛無好到佗去）。可能阿母咧無閒，阿爸欲共我搖予睏。 眾人話題講著對我遮來... 有人問：汰會遮瘦？ 阿爸講：都食袂肥！ 有人應講：應該是kam-chek（疳積這兩字我查台日字典，解說是：gín-á食siuⁿ飽引起消化不良ê病，毋拘怹咧會的，應該毋是這个意思，大概是營養趕袂到的款） 續落有人共阿爸講：遐厚沙屑，共抱去擲掉啦！ 以早的大人，總是講相反的話咧毋甘受苦的囡仔 不時有人共阿爸講：共擲掉！ 我干但驚，都驚甲袂大 是講，予阿爸抱咧搖的溫暖記持，的確是我其他兄弟姐妹毋捌有的經驗。 我予人疼上濟，所以，我有自信；阿爸袂放棄我，共我擲掉。 今、食甲遮大箍- - -瘦瘦的身軀、佮細漢時的歲月，攏袂倒轉來矣！ |
|
| ( 心情隨筆｜心靈 ) |
