 
字體：小 中 大 |
|
|
|
| 2017/12/11 14:38:57瀏覽152｜回應0｜推薦1 | |
|
一直毋肯承認...貓咪走矣
2017.05.15寫 用家己做ê環保酵素透洗衣精洗衫，應該有五、六年矣。會記得是爸母走了無偌久，二姐教我做酵素ê。
酵素洗衫，著用時間去浸，予去分解衫仔褲內底ê lah-sap『骯髒』。暗時洗衫時間較晏，浸袂赴洗，利用洗衫機內底ê預洗設定，半暝仔若有起來，看著洗好，就提出來用衫弓仔晾好了後，閣去睏，透早才提出去走廊掛起哩予ta『乾』。無膽啦，半暝毋敢行出去走廊。 頂年仔飼一隻貓，我若咧晾衫，貓仔會佇邊仔耍，有時陣九怪來咬衫弓仔、有時陣佇邊仔耍伊愛耍ê，有時陣恬恬仔看我披衫，有貓做伴綴出綴入，三更半暝嘛敢共衫提出去走廊曝。 今年年初，貓仔無去了後，我又閣恢復透早提衫出去晾。 佇四箍輾轉恬tsiuh-tsiuh『靜悄悄』ê暗暝，家己晾衫、家己戇想，想伊ê古錐、想伊的九怪、想伊sai-nai『撒嬌』ê叫聲....... 有人叫阮閣飼一隻，我攏應人講：伊閣倒轉來，我tō飼！ 以早捌看一个知名度誠懸ê歌星，因為失去伊飼ê狗仔，有半年久伊攏推掉演出ê機會，彼時我想無，汰會用情遮深？這陣仔...我非常了解彼種心情矣。 總是著疼過別人ê疼，才知影彼下疼有偌疼！ 捌想欲閣飼一隻來疼惜..... 想一下真，毋通！ tō算伊閣伴咱成十年，貓老像人老，厚代誌，彼時陣阮嘛老甲無力通照顧伊矣。ah 是隔壁走來彼兩隻貓罔飼、罔惜tō好。 早起五點捅仔出去晾衫，看向東爿，淺黃色柔柔ê光線，餳我去溪仔邊，享受透早鳥隻鬧熱咧唱歌。 東爿天頂，美麗ê光線，雄雄想起我頭一部用台語學唸ê經，內底..... 東方亦有阿閦鞞佛、須彌相佛、大須彌佛、須彌光佛、妙音佛、如是等恒河沙數諸佛。各於其國出廣長舌相，遍覆三千大千世界，說誠實言。汝等眾生當信是稱讚不可思議功德一切諸佛所護念經。 用台語唸經，加較了解經意。我合意用台語唸經，雖然我知影，並毋是唸出來ê每一字攏有才調正確發音，總是享受用台語唸經ê意境。無欲教人，我想，無稽考遐濟無要緊啦！ 一工ê開始...天誠媠，翕幾工張媠媠ê相片... 遮呢晴朗ê天，汰會想著...暗來..外口煞咧落雨 這就是人生！ 花蕊閣較媠，總有成做落花時。 貓咪閣較古錐，伊嘛是離開。 欣慕....東方琉璃世界....遐...無病、無苦 |
|
| ( 心情隨筆｜心靈 ) |
