食晝

2016.05.15

早起我參台語約會，參加一個月一遍的讀冊會、燕子參伊的上帝約會。會後兩人去這間餐廳午餐的約會。
我欲寫的，毋是兩个查仔人的約會，這若欲寫，著寫一本冊。而且其中目屎佮笑聲平濟。

我欲寫的，是阮拄著「台語囡仔」。

代誌是按呢...
當我徛起來欲去便所的時，兩个三、四歲款的查某囡仔，綴我來到便所門遐，掠我金金看。我問講：「恁欲入來hioh？」應講：「毋是！」就走去矣。

這間餐廳是舊建築改造的，真闊；便所強欲比我的房間較大間。
我對便所欲出來的時，彼兩个查仔囡仔...閣加一个拄咧學行的查埔囡仔，擋著我的路。怹的序大人無閒開講佮食飯無看著，我驚我若跋倒，共彼个細漢的硩著，就激痟鬼仔面共háⁿ，伊煞哭出來。怹序大人才緊共抱去。（哈！！我的痟鬼仔面一定真歹看！）

當我坐落來，彼兩个查仔囡仔煞來覆佇我桌跤，掠我的跤一直看。
我笑笑問怹：「看啥呢？」怹袂曉應，我知影怹對我的鐵鞋佮枴仔好奇，規氣共裙尾giú起來予怹看較有咧（無giú真懸啦！呵..）

這是經過歲月操練的成績。
會記得國校仔六年的時，導師tshuā阮出去和美的國校仔樂隊表演。行佇亭仔跤的時，拄好怹學校下課的鐘聲響起，學生仔若像海湧對教室的門溢出來，我愣佇原地毋敢振動【移動】，等學生仔攏過去了，我才閣行。
這一幕，予我的導師看著。轉去學校的時，共同學講愛學翠苓的堅強，面對一大群的囡仔，猶原鎮靜袂驚惶。
我其實是驚怹共我車跋倒，毋是鎮靜。我無解說，只是佇內心吟味別人眼中的堅強、佮家己內心的無奈，原來是仝一味啊！

我想，今仔日這一幕，才是真正的鎮靜。
..... ....
囡仔繼續問.....
：「是按怎欲穿這？」
：「穿這才會當行路啊！」(怹應該是聽無)
閣指我的柺仔
：「哪有這？」

我雖然真願意用我的鐵鞋佮枴仔，予所有好奇的囡仔知影....愛乖乖注預防射哦！
毋拘，遮細漢的囡仔，我實在毋知欲用啥乜字眼，予怹了解這枴仔佮鐵鞋的意義。
兩个查仔囡仔，攏生做膨皮膨皮真古錐，面型仔生做欲仝仔欲仝。我就問怹：「恁兩个雙生仔齁？」
：「毋是啦！」講完閣走去矣。

參怹對話，我全部用台語，怹的應話，嘛是攏用台語。連雙生仔攏聽有，我知影怹是正港的［台語囡仔］。
真歡喜拄著細細漢仔的台語囡仔，啊若家己是毌是真正堅強，已經無遐重要矣，敢毋是咧？