 
字體：小 中 大 |
|
|
|
| 2017/12/07 10:50:52瀏覽35｜回應0｜推薦0 | |
| 抱一下！ (臭生同學講故事予我聽...感動、寫落來） 2016.05.22寫 差不多1968年彼陣仔。 阿榮佮阿梅，一个讀查仔囡仔咧讀的家職學校、一个讀查埔囡仔咧讀的工商學校。兩間校學尻川向尻川，保守的年代，戀愛是一種酸甘甜仔酸甘甜，無蓋重鹹的滋味。 定定會當看著...阿梅參同學行佇頭前，一个騎鐵馬仔的查埔囡仔，慢慢仔綴佇怹後背壁，伊就是咧逐阿梅的阿榮。 相意愛的怹兩人，畢業了後阿梅去台北一間建設公司食頭路，阿榮去做兵。 兩人寫過一站仔綿綿情話的情批。阿梅去予建設公司頭家的小弟仔奅去，批信斷佇『兵變』的時。 閣後來，阿梅嫁予建設公司頭家的小弟仔... 新婚了第3工爾，怹翁tō佇外口飄撇，定定予伊家己守佇新娘房孤單過長暝。 唉！.....想起伊共人辜負的猶咧做兵彼个阿榮。 閣...經過欲倚半世紀.... 阿梅的翁婿過身矣，伊年歲嘛欲倚七十矣，想著初戀的情人....阿榮。 故鄉的阿兄，佇一个偶然機緣之下，看著阿榮的身影。經過太濟年矣，毋敢確定就倚共問：「你---敢是阿榮？」 應講：「是啊...啊？你是....」 ：「我tō阿梅怹大兄啦！」 ：「にいさん，阿梅好否？」 大兄共阿梅的電話予阿榮。 阿梅好否？予伊家己去問！ 阿榮敲電話予阿梅。 佇電話中知影，阿榮的某嘛佇這幾年過身矣。 阿榮約阿梅見面.... 阿梅千里迢迢對台北轉去到雲林約會。阿榮請阿梅食鐵路便當.... 阿梅心內按呢想...你真正是一个巴樂屎，我遐遠來到遮，才請我食鐵路便當？ 阿榮心內按呢想....鐵路便當呢，這是咱談初戀時的『大餐』，這滋味，定著會叫醒妳咱之間彼段情！ 分離欲倚半世紀，欲講的話一大拖拉庫。 揣一下所在好好仔講一下。就招阿梅去阿榮怹厝坐。 阿榮怹後生新婦看阿爸tshuā人客來，稍招呼一下，就攏出外去，將厝間留予阿爸約會。 阿梅歹勢歹勢坐佇膨椅，心情煞若像初戀時的微微仔醉。 坐一時仔，阿榮共阿梅講：「妳徛起來！」 阿梅面變色：「你欲創啥?」 阿榮行倚，輕聲講：「抱一下！」 這一下抱，阿梅眩船矣！ 轉去到北部了後，阿榮電話不斷，熱情的程度，予查某囝佮囝婿攏替伊驚：「媽！人會欲來騙妳的錢否？」 阿梅嫁的是建設公司的家族，一世人食穿無煩無惱，怹翁過身了後，嘛留袂少財產予伊。莫怪序細會按呢想。 阿梅捌問阿榮講，做兵的時予我『兵變』，敢會是來報仇的？ 其實阿梅內心知影，這是延續未了的深情。 因為伊共阿榮講，伊本身有久年病。 阿榮講，我會照顧妳！ 而且，怹有品過；互相之間，情的交往，無欲參雜錢財的交流。 有人講，對的時間拄著對的人；是hau-siâu『說謊』。也就是講，世間無這號代誌。 無的確有嘛歹講。看阿梅最近總是滿面春風，十幾年來無改變過的頭毛型，去電甲媠噹噹。伊講阿榮嫌伊舊的頭毛型無好看。 眩船原來無分少年老，阿梅像十八歲青春女兒...心情振動，跤步輕鬆，久年病佇彼咧...「抱一下」...好一半較加！
|
|
| ( 心情隨筆｜心靈 ) |
