![]() ![]() ![]() |
|
|
|
2007/11/06 11:14:40瀏覽1467|回應4|推薦43 | |
想起細漢時陣,生活環境無通親像這陣蔗快活,平常時仔,無七逃物仔通好玩,也無好食物仔通好食,閣無電視通好看,但是阮做囡仔時陣的趣味,也眛卡輸今嘛的囝仔喔! 阮彼陣攏是相招跳樹乳圈仔、丟沙包、唸囝仔歌,日子就過得真趣味囉!那著什麼卡通、電動、電腦、芭比娃娃? 佇阮兜因為姊妹仔卡濟,定定會玩沙包,阮攏家己縫沙包,其實沙包內底不是底沙,阮放的是米。縫的時陣攏嘛是偷偷阿來,那無乎阮阿祖知影是會罵人ㄟ,阿祖ㄟ講「討債喔,米是要煮做飯來食,毋是要拿來玩ㄟ。」 通常阮攏是縫四、五粒沙包,縫好了後,那玩那唸「一放雞,二放鴨,三分開,四相疊,五搭胸,六拍手,七圍牆,八摸鼻,九扭耳,十拾起。」 這款遊戲按怎玩攏眛厭,越玩越趣味。有冬時仔,不愛玩沙包,阮就玩「掩咯雞」。「掩咯雞」嘛真好玩,做鬼的彼個人目周要用巾仔掩起來,邊仔的人就開始唸「掩咯雞,走白卵,隨汝食,隨汝鑽,放咯雞,去找卵。」然後大家走去密,等彼個做鬼ㄟ來找。囡仔時這是真好玩的一款,阮今嘛想起來也閣想要玩,可惜今嘛的囝仔攏眛曉啊! 我也ㄟ記得那親像真細漢真細漢,阿母也抱佇手ㄟ時,阮也眛曉走路的時陣,阮阿母將阮放佇伊的腳頭屋,阮躺在彼面頂,阿母雙手抓著阮細細肢的手,伊喙內底就一句一句唸出「掩咯雞」。所以我ㄟ記得我也眛曉掺人玩「掩咯雞」以前,都已經對「掩咯雞」的唸詞足熟悉啊! 彼冬陣的囝仔,玩來玩去嘛是這些免開錢毋危險的玩法。若是毋想要定動,毋想要走來走去、跳來跳去,做伙七逃的囝仔伴就惦惦擠做伙同齊唸囝仔歌。若是囝仔伴內底有人卡貪食,大家就要做伙對著伊唸「點仔膠,黏著腳,叫阿爸,買豬腳,豬腳摳仔焄爛爛,枵鬼囝仔流喙涎。」 乎人按呢講的囝仔當然是毋甘願ㄟ,有的人ㄟ氣甲撲撲跳,有的ㄟ氣甲面青損損,有的真巧,想到唱別條彈倒返來,彼種情形著那親像塊唸歌比賽,大家攏毋認輸,拚命甲ㄟ曉的囝仔歌唸唸出來。 尚界趣味的還有「大箍呆,炒韭菜,冷冷無人愛,燒燒一碗來。」誰也毋愛乎人叫做「大箍呆」,因為大人攏講「大箍不離呆」,這敢真ㄟ?若是查某囡仔,尚驚人對伊唸「圓仔花,毋知醜,大紅花,醜毋知。」 到這陣我也想冇,圓仔花明明是細細蕊仔,古錐古錐,伊是叨位塊醜?也閣有,人講紅水黑大扮,大大蕊的花閣是紅色ㄟ,又閣是叨位醜咧?是按怎著愛恥笑伊們毋知醜、醜毋知?真是想攏冇。 ────刊登 |
|
( 創作|散文 ) |