﹝ 客語 ﹞

一到入年假，𠊎屋下就愛做拼掃。

拼掃个方式係在頂高做到下背。先做屋頂，用長柄掃將壁角罅罅阿，毋好分蝲䗁生蝲䗁網。續下來做壁項，櫃仔、掛在壁項个圖畫用淨布拭淨，毋好壅塵打灰。灶頭鑊仔洗到淨俐俐，盆頭缽仔刷到金金金。最尾就係地泥，掃淨、洗淨就算做完咧。拼掃係大棚事，𠊎以前後生，自家一儕分幾擺就做得忒；後來年齡增加，做後會腰拑背吊；這幾年，老公摎倈仔會行前來𢯭手，細倈人較有力，𠊎就輕鬆多咧。

這間屋有三十零年个歷史，係𠊎老公家族從莊下﹝ 楊梅伯公岡 ﹞來到台北落腳个所在。𠊎老公个姊妹在這戴過，讀書、做事後正嫁出去；𠊎老公个阿哥在這戴過，做事、討餔娘、降子女後，樹大分椏正搬出去。

屋仔拼掃過後，就像梳妝打扮个細阿妹仔樣，春風滿面心情樂暢；佢講，現下還較有精神好抵風遮雨，福蔭屋下人！