2022.08.15寫

昨早起透早用khah-lím一點鐘的時間騎車去田尾仔。

下晡4點外離開，想講若照透早起的速度，轉來煮暗頓猶liōng-liōng。

想袂到我用兩點外鐘的時間才到斗六。

西螺溪橋橋跤有一條較無青紅燈往斗六的路，早起就是行這條路。

回程行甲一半感覺有一个路口越毋著去，想講［條條道路通羅馬］，凊彩行嘛會到位。

就一直共騎落去。

這是一个錯誤的決定。

騎足久的，路愈來愈細條，景色愈來愈稀微，大概是黃昏天氣有較涼矣，狗仔攏走出來散步。

我真驚狗仔，佇我的內心，路邊的野狗比七月時仔的鬼閣較驚人。你若捌去予狗咬過、tō知影狗仔比七月時仔的鬼較驚人。尤其彼狗群結黨彼種狗。

平時仔下班行農路，若拄著狗，我就共彼條農路讓予伊，越頭行別條路。

但是這个時陣，欲重揣彼條正確的來時路，恐驚仔是無地揣矣。

抱著驚惶的心，毋敢騎緊，想欲問人看無人。真無簡單看著有人徛佇厝外口，我緊倚來問路，去斗六欲怎行？

伊想想咧笑笑講：妳對附近的路有熟否？

這是啥問題？若有熟，thài會變做一隻驚惶的糜鹿？

伊講妳若無熟，我毋知欲按怎共妳講。

伊想一下仔才講：按呢啦，若返頭行是較近，毋拘路較複雜閣無路標。無、妳順這條路閣行，行甲一間廟仔，越廟仔對去頭前彼條路，過一个青紅燈倒越，閣行到大圳彼就有路去斗六矣。

我欲起行，伊問講：按呢聽有否？

我唸一遍予聽，伊講：著！

夭壽，照伊講的路，路邊的狗比早陣閣較濟，而且規群規群，若像咧等我，欲共我嚇驚。

閣行、騎甲強欲懷欵我是毋是閣行毋著去？

總算看著大圳，過大圳？了後咧，行正爿抑是倒爿？

提電子地圖出來查…看無！我做學生仔的時地理這科我上差，捌共老師氣甲擲考試單，閣較簡單的地圖我攏看無。電子地圖指示一條路。毋拘我毋知影伊表示的是正越抑倒越？

天有淡薄仔暗，莫講轉去煮暗頓，天暗進前若行會出這个迷魂陣就足gâu矣。

佇大圳邊躊躇一睏仔，敢著來博杯咧？？？

佳哉這時陣有一个騎鐡馬仔的小姐倚來，指示我行著正確的路。

轉來到厝，才想著，哎呀！人彼个人有講，過大圳越正爿……

啊！就是按呢．我一向都正爿、倒爿分袂清。

後擺一定欲閣行一擺，我毋相信成點鐘的路，著用雙倍的時間才行會到位。

＊

khah-lím=略少於

liōng-liōng=綽綽有餘

tō=就

thài會＝怎麼會