字體：小 中 大 |
|
|
|
| 2017/12/11 08:29:35瀏覽263｜回應0｜推薦4 | |
|
我捌少年過..
咧整理房間ê櫃屜，看著這張相片，袂當無承認，家己ê記持其實無偌好。 已經袂記得是佗一年，tshuā我去野柳看女王頭ê...是誰？ 干但會記得是佇仁愛學校熟似ê，一个讀大學ê阿姐，參怹男朋友約會，tshuā我去，怹男朋友tshuā怹小弟，相片內底閣另外彼个小姐，是誰？一點仔印像都無。 誠欽佩家己當初ê體力，有才調行遐遠，爬遐懸.... 雖然經過幾何十年，大部份的代誌攏放袂記得矣，有一个景，我永遠記牢咧.... 彼時，有遊客會共銅錢仔擲落去水裡，當地ê囡仔真gâu泅水，佇銅錢仔落水共hit時陣，怹就跳落去水裡，共銅錢仔hoo起來，誰hoo著，錢就是伊ê。真濟囡仔攏佇岸頂，撨隨時欲落水的姿勢，等人擲錢落水底。 我佇遐看誠久，猶無看著半个銅錢仔沉到水底tō落囡仔的手裡。 毋拘彼當時，我ê心...沉落去到水底 想講，錢欲予人，汰著用這種方式，抾錢ê囡仔，看起來足可憐。 佇阮足散食ê時，有一擺一个查某乞食tshuā一个囡仔來分，阮阿娘佇規堆的蕃薯裡，揀一條上媠ê，雙手送予上門來分ê艱苦人。散食ê阮兜，píng無比彼條蕃薯閣較會當予怹食飽ê物件矣。因為阮厝定定食蕃簽脯煮飯，連蕃薯箍飯tō誠少食著。 阿母彼種謙卑ê身影，對比咱較苦憐ê人，予伊溫暖，是我一世人學袂曉ê慈悲。 從去野柳了後，便若是電視咧講，女王頭得欲斷去矣，我攏會誠毋甘，因為彼是遐呢難得ê自然景色。 但是...這幾年來，已經袂感覺毋甘矣。 因為...沓沓仔知影，天下間萬物攏著承受- - -成、住、壞、空，無一个逃脫會過這ê過程。 想起阿爸年老ê時，共阮講：若有啥代誌，免驚我煩惱、毋敢予我知，食甲這个歲，啥乜代誌毋捌經歷過？ 我若像愈來愈行倚阿爸彼當時ê路矣！
|
|
| ( 心情隨筆｜心靈 ) |
