今仔日，許居士佇雲林故事館講有關死亡的繪本故事。
生日講死亡？無毋著！
　
聽伊講幾何本死亡的繪本故事，誠精彩。
共咱講，面對死亡，會使哭，但是毋通過頭悲傷。因為死亡一點仔都袂恐怖。
　
死亡，像nǹg（穿越）一个長長長的磅空，佇起程的時，啥乜掛礙攏無矣，輕輕鬆鬆行入去另外一段的旅程。
聽到遮，有淡薄仔歡喜。共坐佇我身邊坐電動輪椅的默然講：連鐵鞋都免穿矣哦！
我袂記得共伊講，連伊彼台重hoâiⁿ-hoâiⁿ的電動輪椅嘛免矣。

按呢想，我若像是一个背恩忘義的人。
鐵鞋予我會當徛起來行，我毋但無感謝伊，顛倒一直親像對待冤仇人按呢，想欲共伊擲去遠遠遠的所在。
無法度，我都誠無合意hông束縛的感覺，雖然原罪是病菌，煞感覺是鐵鞋、枴仔縛我一世人！

死亡之神，自咱出世就綴佇咱身邊，毋是欲掠咱去，因為伊毋是決定咱生死的神，伊只是欲佇上落尾彼的時刻，送咱一蕊花，祝福咱行去另外一段旅行。

每一个繪本故事，攏誠精彩，網路攏有通揣著哦。
佇遮分享這支影片....... 鴨子‧死神‧鬱金香

死亡之神若真正生做這種形，我真正毋驚！