會記得這隻貓拄來的時，瘦甲一个腹肚扁扁扁，跛跤閣無膽，攏覕佇車跤看別隻貓咧食，著另外囥寡仔飼料去車跤，伊才有通食，想講伊參阮仝款是『共殘黨』，會特別注意伊有食抑無食。
　
嘛袂記得飼偌久了後的這馬，伊已經成做這陣貓的貓仔王，逐隻都讓伊，掠去閹了後，開始生肉，彼khian腹肚，定定有厝邊問，敢是有身？
袂啦！已經閹掉矣。
　
看伊這種對環境熟似了後的自在，想起我家己來斗六蹛的初期。　
　
來斗六第2日，阿勳tshuā我去菜市仔認路。了後，我若去買菜，攏照伊行的路線，先去圓環仔揣往林內的文化路，經過鎮東國小無外遠，就會轉到厝。
　
我若揣無路的時，會問人鎮東國小佇佗位？因為本成就誠頇顢認路，真久真久的時日，攏毋敢變換路線。
後來有一日，雄雄發現別條路，嘛會當對菜市仔轉來厝裡。後來的後來，閣發現，條條大路通阮兜。
　
彼種對環境熟似的感覺，誠好！
　
捌參二姐咧講，享受這種熟似的感覺，人生的路愈行愈順，時日若到，káⁿ會毋甘轉去咧？
　
其實免煩惱這，身體漸漸衰微的痠疼佮艱苦，就會教咱按怎斷捨離。
　
正手中指（tsáinn ）若像自古早就咧疼，只是毋捌像最近疼甲遮徹底。
囡仔轉來彼時，問伊..敢有啥特效藥醫這？
應講：剁掉就袂疼。
呔參怹外公仝款？
以早捌問阿爸，痚痀敢會好？阿爸應講，頭剁掉就袂喘。
　
載囡仔去火車頭坐車，毋死心閣問一擺：恁同學遐濟人做醫生，你嘛問看有啥撇步，予這个板機指一下就袂疼否？
囡仔應講：去看醫生啦！信任醫生，莫咧揣啥撇步！
　　
好啦！人講順囝令較贏咧敬神明。
　
去揣醫生，一見面，伊就講：這袂好！
　
喂！醫生人呔會遮呢予人無希望？
　
伊講：我會使替妳開刀，一下仔就好。毋拘會閣發作。因為妳的問題，毋是疼，是習慣問題。
醫生提一塊杯仔予我提，我提過手。
伊問講：妳遐下力欲創啥？
應講：驚杯仔落去。
伊叫我莫下力，看杯仔敢會落去？
袂！
醫生閣捎一隻電老鼠叫我使用予看
伊嘛是講：妳遐下力欲創啥？
？我嘛毋知，慣勢矣！
著！就是毋好的慣勢，予我遮呢疼。
　
佇診所做復健，醫生開藥仔予我，講若疼甲擋袂牢，就食藥仔！
　
我開始斟酌觀察使用中指的情形
原來，中指予我蹧躂甲這个形，毋是無原因。
日常的騎車掜（tau）擋仔、giâ枴仔、炒菜提煎匙佮上班掠彼隻電老鼠，過頭使用伊。
　
一直提醒家己，避免無必要的下力。
避免下力，嘛避袂過痠疼。
好天的時，下班了去做復健，第2工會當正常使用；若是落雨天，歹停車我就無去做，疼起來，就食藥仔！
本成食西藥就誠袂適應的身體，食止疼的佮肌肉鬆弛劑，手袂疼矣，毋拘全身軀tèⁿ袂出幾絲仔力頭通振動。
　
就醫的頭幾工誠毋甘願；都才當咧歡喜熱人到，鼻仔會通，會當睏規暗，痠疼煞綴咧來攪擾，人生，真正是苦袂了！
　
這幾工，認份矣，想講…佳哉止疼藥仔猶有效，佳哉做一遍復健會當擋24點鐘久，佳哉這个疼，提醒我，中指著惜略仔用。
　
誠欣羨這隻貓咪，跛跤已經好離離，伊脫離『共殘黨』，阮卻是永遠的會員，欲閃，閃袂去！