字體：小 中 大 |
|
|
|
| 2017/12/13 09:40:02瀏覽407｜回應0｜推薦10 | |
爸母的心...誰知影 2017.09.02 早起去皮膚科，共額頭一粒魚鱗癤點掉，毋是為著愛媠，是逐遍戴安全帽仔的時去huê著會疼。 蔡皮膚科的患者真濟，一个歐吉桑讓位予我坐。 本成就知影著等足久，有紮冊去看；看一段落舉頭起來，坐佇我身軀邊的阿桑（就是讓位予我坐彼个歐吉桑的牽手），笑笑仔問我講：蹛佗？ 我講佇附近爾... 歐吉桑問我：汝敢捌去和美彼間學校讀冊過？ 啊！原來自我行入來，怹眼神一直目注佇我身上，是因為怹嘛有一个行動無方便的查某囝，捌參我共款讀過和美彼間仁愛學校。 怹兩个講著袂行的查仔囝，面容全是毋甘的心情。 雖然怹查仔囝結婚、生囝，孫嘛做兵了矣。 我共怹講，飼著阮這款囡仔，做爸母的心是比阮較艱苦，而且毋甘一世人.... 阿桑目箍紅紅講：啊，汝閣會曉按呢想。咱tō有影共人生做按呢！ 我講無人愛按呢啦，這嘛毋是做爸母的過失！ 看怹行出診所的身影，兩个頭毛攏白矣，猶是掛心生一个袂行的查某囝。 想起阮阿娘生命尾站，一遍我去看伊，哥哥共我講：伊呀從早起坐到這陣，毋食、毋講話！ 我倚共sai-nai（撒嬌），伊嘛是兩眼無神看頭前，無應！ 我共講：伊呀！汝袂記得我哦？我是汝彼个跛跤仔囝啦。 阿娘聽著［跛跤仔囝］，大聲喝講：汝莫講跛跤仔囝啦！ 肯講話，飯就肯食落去矣。 是講，我實在足可惡，用這種殘忍的手段，逼阿娘失落的神魂倒轉來。 tō算是半失智的我的阿娘，猶為著袂行的我咧心疼。 天下爸母心啊！做女兒的我，汰會當無快樂過日予怹看？ |
|
| ( 心情隨筆｜心靈 ) |
