字體：小 中 大 |
|
|
|
| 2017/12/07 16:27:05瀏覽570｜回應0｜推薦21 | |
|
鶴.好
2016.10.21寫
早頓配報紙。看著這張圖，煞想起我細漢時阿爸ê身影。
這叫做鶴，是阿爸教我認捌ê。 我細漢時厚病疼，半晡半暗若發燒，阿爸無佇厝裡，伊呀會予我倒佇眠床，等阿爸轉來，有時是去請醫生來注射、有時阿爸會載我去夆看。 彼是有一遍破病，中晝時阿爸對田轉來，掀開床簾仔，對我ê頭額仔挲挲咧，我感覺阿爸ê手真冷，其實是我發燒。阿爸坐佇床墘參我講話，講啥？我已經袂記得矣，干但會記得伊指床簾仔頂頭ê圖，共我講：這叫做鶴，日本一種代表幸運的動物。（毋是今仔日這種鶴...是日本的鶴) 彼陣仔我抑毋捌字，想講阿爸講的是…好！ 後來若掀開床簾仔，我攏會佇內心叫一聲：好！按呢，心情tō會變好。 閣有一个尾暗時仔，門口埕真濟囡仔，怹咧耍拍球、走相逐、覕相揣…等等，我孤一人坐佇埕邊看怹耍，手提柴仔枝佇塗跤烏白畫。 阿爸定著是佇邊仔看我足久矣，伊khû（蹲）落來我身軀邊，提過我手裡ê柴仔枝，佇塗跤畫一个人頭，共我講：汝看！汝共尪仔ê喙畫翹懸起哩，伊tō咧笑、若共喙畫垂落去，伊tō若像無歡喜。 阿爸起身行入去厝裡。我佇塗跤共咧笑的喙形，描予足深、足深。定定會想起這句話。喙角懸懸…tō是咧笑！ 我大漢了後，阿爸捌講伊感覺足奇怪，一般殘障ê人，面裡攏有一種講袂出來ê憂愁，是按怎我攏無這種面腔？ 我嘛毋知 我想…大概是因為 我ê憂…恁攏替我愁了矣！ 我負責快樂tō好。
|
|
| ( 心情隨筆｜心靈 ) |
