昨早起朋友來斗六開會，十一點外會開了，因為阮囡仔拄轉來佇厝裡，就邀請朋友陪阮規家伙仔食中晝。 

中晝食飽時間亦早早十二點捅仔爾，勳仔參囡仔轉去厝裡，我佮朋友兩人想欲開講，就帶伊去辦公廳的路裡，順續去郵局總局領一本支票簿仔，頂工勳仔去辦過，郵局通知愛我本人紮身份證合印仔去領，幾何工中晝時仔攏落雨我較痞出入，趁這工好天緊去領；想講領一本支票簿仔應該免幾分鐘，予朋友佇外口等我……。 

郵局總局我較罕來，向一位窗仔口的先生請教，支票簿仔欲怎領。伊面向內底，共一位坐內底應該是主管級的先生講我欲領支票簿仔，對方有問我的名。窗仔口這位先生叫我徛這等就好，免抽號碼，等一下人會提予我。等啊等，經過差不多成十分，我看毋是勢，是按怎提一下簿仔愛遮久？窗仔口這位先生已經提一塊〔請至其他窗口辦理〕的牌仔閘起來，頭lê-lê咧算錢準備歇睏……我緊問伊：「先生、我等遮久哪會攏無人提來？」伊越頭看內底，早陣答應伊欲提支票簿仔予我彼位主管已經無看人，窗仔口這咧人雄雄煞變啞口，我大聲閣問一擺，伊當做無聽著，無外久越身做伊下班去矣。 

鼻仔摸咧，我去抽一咧號碼牌仔，打算等人叫我的號碼領物件。號碼機仔顯示排佇我頭前猶閣有36個人咧等，看唯櫃台．．．夭壽，成十個窗仔口，干單開放兩位，其他攏囥一塊〔請至其他窗口辦理〕……就是等啊，無欲按怎？雖然開放兩個窗仔口，其中一個毋知咧辦啥，十幾分鐘號碼停佇286攏無換過，也就是講，一個窗仔口咧服務三十外個用郵者，邊仔已經有人等甲tshò出嘴，我徛徦手足酸〔手舉拐會酸〕，三十幾個等甲來，上班袂赴事小、怎忍心予朋家佇三十外度熱天大日頭跤咧等呢？

我提出勇氣，行到一個歇睏的窗仔口，共兩個內底咧開講的小姐講：「小姐，我欲領支票簿仔，敢會使請汝提予我一下？」伊應講：「抽牌仔！」閣繼續怹的話題。我共伊講：「拄才有一位先生叫我免抽牌仔，連鞭有人會提予我；結果我等十幾分等無！」伊看唯內底座位了後，應我講：「辦支票簿仔的人十二點半拄走，下班去矣，汝愛等伊來！」這……代誌哪是按呢？我十二點半進前就來，是按怎無愛先予我，做伊下班去？我忍不住大聲嘍：「共恁領一本支票簿仔有遮困難嗎？恁通知的時，哪無講這咧時段毋通來領？」伊看我大聲，才問內底一位好像主管的查某人：「人欲領支票簿仔，汝敢提會著？」伊叫我身份證參印仔予伊，都免一分鐘，簿仔提予我矣！ 

行出斗六郵局總局，朋友覕佇雨傘樹跤咧等我，內心感覺足歹勢、嘛對郵局的服務精神感覺足倒彈。上班的人欲去郵局辦代誌，總嘛是利用中晝歇睏時仔敢毋是？是按怎郵局佇這咧時陣掛出來一塊閣一塊〔請至其他窗口辦理〕的牌仔？ 

是阮生做顧人怨？抑是衰神來戲弄？最近毋是買衫夆鄙相菜市仔貨、就是請人幫忙提行李人無愛插咱。昨昏閣搪著這層予我強欲掠狂的代誌，無寫出來會氣甲著內傷……寫出來予恁講一下仔公道話，若是汝、汝敢袂受氣？