阮的伊呀倒佇病床

一直睏

據在阮共搖、據在阮共叫

伊一點仔都無注問

敢是自早到今為這個家

付出的悿頭睏到本？

囝兒序細伴佇病床邊（除了33）

阿爸逐工來探問

用親情呼喚、用耐心等待

伊呀的身軀予人叫精神

神魂煞毋知紡見唯佗去

:「共逐家講、我欲來去矣！」

：「汝欲去佗？」

：「去淨土……」

阿姐講汝若無佇咧

33轉來揣無伊呀會啼哭

講煞家己覕去便所大聲哮

阿母的神魂逗逗仔轉來矣

袂當自主的身軀

煞染著憂鬱沉重

毋敢怨嘆上天創治人

只有心疼阿母的艱難

五日節的跤步

綴著青蘢蘢的粽葉仔

無聲無說走來鑿疼阮的心肝芛仔

無阿母的鼠殼粽

歡喜的滋味轉暗淡

今年的肉粽啥滋味？

親像詩人腹內孵無詩的人生…

白汫無味！