<<台文雜記~~幸福地圖>>
    

     逐家攏向望(希望)得著幸福，毋過時常giâu疑(猜疑)幸福是啥物??若我講~~幸福是一種感受，是一種免講出喙自然的相伨(支持)，若囥佇(放在)心內是有形的，囥佇外口就綴塗粉(灰塵)颺颺飛....      真濟人寢頭(剛開始)慾望攏猶細細，容易滿足容易樂暢，有通食飽穿燒，有一寡兄弟至親，有ㄧ間破瓦厝仔通崁頭，就感覺幸福地圖咧暴穎(發芽)，頭前蔥蔥綠綠矣.....     

     毋過佇社會這ê大甕滒久，無情理的代誌看濟矣，人心肝牛腹肚，彎彎斡斡愈來愈貪愈來愈複雜......煞共原本條直的上望擲㧒捔(丟掉)，這聲(這時候)目睭開始起雺霧，目頭看懸無看低，看利毋看義.....就按呢～沓沓仔沓沓仔愈liâu愈深，愈行愈偏...毋聽人勸閣也毋願越頭～(人牽毋行，鬼牽溜溜行)，袂曉珍惜身軀邊(簡單的幸福)，疏忽上根本上媠的初心.....      

     檢采一ê人拚死拚活甘焦欲追求虛華，爭名奪利，定著會迷失心志，不時佮幸福相閃身，按呢做是偌爾仔(多麼)khong-khàm(愚笨)的行為，毋但(不但)拍交落(遺失)純真，背後閣予人kí-kí-tuh8-tuh8(指指點點)，論真佮想起來真是會予親友慼心(傷心絕望)佮晃頭啦!!

**現此時阮上簡單的幸福就是一禮拜一改佮好友佇讀冊會同齊讀這本"未竟之業"~作者 <安.瑪莉.史勞特>