<<台文雜記~~性命觀>>

     這站仔真濟朋友的長輩破病蹛院，攏八十捅頭--頭--頭囉～有ê甚至嚴重甲愛插管急救，佇加護病房鼻胃管,尿管...大細台救命機器齊出動，跤手閣予人縛牢咧，袂振袂動，一蹛就月外日...所致，予阮陷入深深ê思考當中，"人"到底愛食甲偌濟歲才算是長歲壽，會使掛『壽終正寢，福壽全歸』的牌匾lè。明知即是隨人人生觀的看法，俗語講一樣米飼百樣人，一人一款命，絕對無地揣標準答案啦????

      性命欲多彩多姿看重的應該是內才，闊度佮精采度，毋是長--度啦!!食久閣勇健上蓋讚，檢采觀念失覺察，怨慼較濟過滿足，目睭所看的攏是失望啦，傷心啦，㾀勢命啦，透底毋捌和"幸福感"相拄，佮"幸福感"離甲遠遠遠抑是拍交落矣，按呢？按呢？雖罔一世人長lò-lò敢猶閣會使奢颺喝出"長歲壽"較好較福氣lè?????

*幸福定著是一種心裡狀態啦*

106.7.16