<<台文雜記>>~~浸水鞋按呢講~~(基隆淹水彼一工)

今仔日6/2拜五阮主人罕得奢颺穿淑女鞋出門。

 我來自我紹介一--e，有尖尖的頭形長躼的身軀，白殕白殕光滑的皮面，頭前閣有一ê長ko形phùn幼璇仔(假)的妝娫，毋但影目閣不止仔媠。毋過，今(tann)穿主人煞詬詬唸:買毋著矣～無應該買尖頭ê，尖頭穿落kik跤，跤指頭仔櫼櫼做伙毋當伸勼，歹行路啦…(我頭犁犁)

佮主人經過幾偌改的慣勢，伊忍我的窄我忍伊的闊，看主人對(ùi)後悔到合跤，愈穿愈歡喜，愈行愈自在，已經拍算共阮成做這冬熱--人行東往西，桌布兼禮數的武器囉～

毋過...毋過...透暝天像破空仝款，緊閣粗的雨水那倒那吼，攏無歇睏，phi phi phiah phiah驚死人喔!!一霎仔久就放送出遮淹水，遐嘛淹水，車駛袂得過，人嘛毋好強liâu過，誠危險ne.....

雨雖罔急閣粗，袂赴洩水，但是，我用尖頭一直想##日常逐家若有注意排水溝的清理，塑膠橐仔，飲料罐，免洗杯.....啊～總講糞埽毋通烏白擲，隨時疏通排水系統，定著會減輕淹水的災情，予兇狂的雨水有出路通流，百姓身家性命嘛才有保障，人矣恁著覺醒，愛護地球珍惜環境啦.......向望有關單位加用寡心，拍拚有路用的建設，毋當干焦佇選舉進前喝甲大細聲(膨風水雞thâi無肉啦)，一有代誌就挨挨推推......唉.......

我只是一雙普通的鞋，綴主人一逝來一逝去，揣無轉厝的路通行，liâu過大路變溪河，車牌成水池，險險予大水驚--著，無辜的浸--水--鞋--爾爾........(我猶原頭犁犁)

106.6.18