<<台文雜記>>

      "父母疼囝長流水 囝想父母樹尾風"早起的街景，誠濟父母送囡仔欲去學校，嘛有趕上班欲出門拍拚e少年族群，人潮車潮來來去去挨挨陣陣，我嘛佮人緊張甲綴咧三步做兩步行。
         

     這時陣，無張持看著一ê大略國小四年仔ê查埔囡仔徛佇一台殕色轎車邊仔，神神秘秘掩掩揜揜，這爿䀐䀐咧彼爿䀐䀐咧，定著是欲做啥物歹代誌??我淡薄仔好玄，to停落來恬恬仔kah偷繩。
          

     果然，規欉好好~無剉~一塊餡包甲飽滇飽滇，看起來誠營養好食的(三明治)"啪"一聲覕入去車輪仔跤，這查埔囡仔掠準伊按呢做神不知鬼不覺，家己足巧會曉解決問題，毋過，伊袂暸解嘛想袂夠，這毋但拍損人ê物，浪費金錢，更加傷著父母"疼囝的心"，閣造成環境的汙染.......真予人感嘆這馬的少年父母為著賺錢飼家，傷無閒傷拚勢，才會疏忽著陪伴囡仔食早頓….....