＜＜台文雜記～感恩的心＞＞

     社會上有真濟(多)辛苦的人，佇揜貼(隱密)的所在恬恬仔(靜靜)盡家己的本份。

    會記得幼稚園每學期攏(都)會共(把)<<感謝幫助阮的人>>編入去教材單元內底(裡面)譬論講~警察阿伯仔，清潔阿叔仔，掃路阿姨仔，送批阿叔仔抑是保護國家的阿兵哥仔......等等濟濟ê骨力(勤勞)人，攏是咱應該表示感恩佮尊敬的人...。

    盈暗(今晚)摒糞埽(倒垃圾)的時陣，糞埽車比往時較歹味，原來是潘(餿水)載足濟，貯(裝)甲滇滇滇(滿)，有人遠遠tō(就)共鼻喙掩牢牢(蓋住口鼻)閣激出誠嫌惡的面腔，逐家嘛知影這款臭酸味予人強欲反腹，正港是誠歹鼻(聞)，毋過(不過)共想一ê倒轉來，咱摒糞埽干焦(只有)一觸仔久(一下下)時間爾爾(而已)敢講(難道說)袂使(不可)小可噤氣(憋氣)抑(或)是掛喙罨(戴口罩)，按呢(這樣)才袂(才不會)去傷害著清潔人原的自尊啦～有ê人毋敢行uá去(靠近)，像投籃球仝款(一樣)用giat(砸)的，我感覺實在真無禮貌，假使漚漚臭臭的工課無人欲做，按呢咱逐工所產生的垃圾物就疊甲懸懸懸(高)，欶(吸)的空氣濁濁濁，連蹛的環境嘛變成糞埽山，腌腌臢臢(骯髒)臭臭薟薟，到時陣逐家欲哭就無目屎喔…

       PS***人佮人互相尊重是一種基本的禮貌絕對袂使存著（一人一家代，公媽隨人祀）的自私心態。