下課了後，phainn一包重huâi-huâi的教具，行到公車站牌仔，徛一早起跤淡薄仔各樣(因為新鞋)看著有椅仔通座，"咚"一聲趕緊tng3落去，攑頭看清楚車到站的時間，猶閣十分鐘才進站，就心情放予輕鬆，自然提手機仔出來餾，拍開面冊四界看看咧，讚揤揤咧，line嘛一格一格掰掰咧，誠濟"早起好"的貼圖，論真講無啥奇巧的代誌。

毋過這陣仔欲揣無用手機仔的人誠少矣，逐人攏嘛"機不可失"規工攑牢牢，予手機仔的線頂資訊淹甲密密密，連過馬路也無斟酌佇看青紅燈 ，兩蕊目睭圓輾輾khoh-khoh繩，耍甲無暝無日，莫怪"宅男宅女"愈來愈濟，定定予網路諞仙仔利用去，任何事誌攏愛兩爿磅磅咧，科技進步雖罔帶來利便，毋過嘛帶來倒面的影響.......總講一句家己愛會曉撙節啦。    

未來的世界會變怎樣??無的確.....雄雄501咻一下!!衝誠緊!!!盍會按呢??我貓貓看的公車 !!佇我面頭前奢颺駛過去~~~~唉…一時失覺察煞予車走去，手機仔害人啦？??