我近年從事客家語教學，接觸母語、探索文化、欣賞文學之美麗。首次嘗試用客語﹝海陸腔﹞書寫；這篇〈雞公鬧鐘〉描寫母親在簡僕的生活中送我一個鬧鐘，而這個鬧鐘竟然成為母親身後對我的陪伴。

在 ngai个眠床頭，放等一個雞公鬧鐘。

這係二十零年前个事情。有一日，ngai 兩公婆渡妹仔、倈仔共下轉外家。行落屋，坐下正，阿姆就拿出一包用手帕仔包等个東西，笑笑仔講：「這分你喊 ngai 外孫 hongˇ床讀書用。」 接過阿姆手項个東西，解開舊舊个手帕仔，看到一個新衝衝个雞公鬧鐘，雞公頭那頂還有紅噹噹个髻。 ngai 用手指頭  kim＋ 一下雞公髻，就聽著「咯咯該、咯咯該…」个聲，再過 kim＋ 一下，聲就停忒；實在真生趣！

阿爸講最近社區有私人公司來賣藥品，隔壁鄰舍相賽會過去看詳細；所有出席个人，無論有買無買，煞棚後都會分到一項紀念品；大體係生活用品。阿姆會湊隔壁一個朋友，該個朋友就騎「喔都拜」載阿姆共下去捧場；幾擺過後，分著洗碗精、洗衫粉、茶罐這兜東西。阿姆一向無收入，生活當省儉，佢認為同人增人氣換紀念品係一個好機會、一件好事情。有一日，阿姆又坐等「喔都拜」出門；入門，行路跛阿跛，手項揢等一個鬧鐘仔。原來佢坐等「喔都拜」个時節，腳骨分旁唇經過个車子磨著，溜皮；阿爸就吩咐無好再過去分東西咧。

阿爸已昨耕田，田頭田尾、灶頭鑊尾盡多事，阿姆常常無閒直掣做到兩頭烏。還有畜頭牲，乜有畜雞仔。逐日天 mang 光，聽到雞一啼就愛 hongˇ床做事；係忒 tongˇ睡，該日个事就做毋煞。阿姆講：「早 hongˇ三朝當一工，早 hongˇ三月當一冬。」

阿爸、阿姆多歲咧，離開老屋搬到街路 teng 倈仔。無畜頭牲，乜無麼个事好做，做得清閒睡到日頭曬壁角。毋過阿姆還係天一光就下眠床。阿姆看到雞公鬧鐘就像寶物樣仔，講：「細人仔係肯讀書，茅寮都會出相公。」這係佢一直感覺自家毋識字就像青瞑樣个心肚話。

現下係電子時代，生活用品當進步，手機仔做鬧鐘方便又好用。毋過在 ngai 个眠床頭還係放等這個雞公鬧鐘，這係阿姆留分 ngai 个手尾。定定仔看，用淨布輕輕仔 cudˋ，該囥在心肝肚个記憶，就像電影樣仔，一幕一幕浮現起來。

說明：

ngai 个：我的。                       手尾：遺物。                        「喔都拜」：摩托車。            hongˇ床：起床。                  天 mang 光：天還沒亮。                  kim＋ 一下：按一下。                    相 coiˇ：互相。                     無閒直掣：忙祿的樣子。               tongˇ睡：貪睡。              青瞑：瞎眼。               定定仔看：慢慢的欣賞。                輕輕仔 cudˋ：輕輕的擦。    佢：她，指母親。