這是我嘗試以漢字、客語書寫的文章。描寫祖母為了節省五毛錢而捨不得買糖給孫女的我吃，多年後祖母想起仍然心裡不捨；而這些卻使我從小培養節儉的習慣。

ngai 婆這棧發病仔，在眠床頂 te 等，睡毋忒會想該想這，也會講兜有个、無个事情。        

 ngai 婆：我的祖母。 這棧：這段時間。 te 等：躺著。

「ngai還毋盼得喔，就五角銀定定咧！」阿婆在該自家冷念咧。

仰會恁毋盼得：怎麼會這麼捨不得。

「瑞珠，想起阿婆頭擺對你恁毋盼得，這下心肝頭還會痛喔！」ngai 聽毋識阿婆講个話，就偎近去問佢。

頭擺：以前。聽毋識：聽不懂。偎近：靠近。

「阿婆，你到底講麼个，係毋盼得麼个？」ngai 企到阿婆个眠床脣，背痀痀、細細聲問。

 企到：站在。背痀痀：彎著腰。

ngai 還細个時節，阿爸日時頭出外上班，阿姆耕田、種菜還愛畜頭牲，毋閒赤掣長透做到兩頭烏。阿婆在屋下度ngai 兜，ngai 兜兄弟姊妹逐個都係佢背大个；阿婆摎ngai 兜个感情第一好。

毋閒赤掣長透做到兩頭烏：指從早做到晚、非常忙碌的樣子。

ngai 婆長透會去伯公下拜伯公。今晡日天時好，阿婆做閒了，牽等ngai 个手，兩子阿婆像搖三阪樣仔，慢慢來到伯公下。阿婆將東西放在神桌頂，準備愛拜神。伯公下个隔壁有一間雜貨店，店肚有賣糖仔，ngai 起腳花、三步做兩步來到雜貨店个店亭下。店門口放一列玻璃盎仔，盎仔肚裝等各種糖仔，有：酸梅、地豆糖、柑糖、son、仔乾‧‧‧十分餳人。ngai 嘴擘擘、目金金看等該兜玻璃盎仔；酸梅甜甜酸酸，先細細口咬幾下仔，伸个留來沖滾水就係酸梅茶；地豆糖香香甜甜，咬等挷出來，就像蝲䗁牽絲樣仔；柑仔糖圓圓甜甜，先舐幾下過願，伸个做得準圓子lenˇ，看麼个色lenˇ較遠；son、仔乾紅紅酸酸，食過後嘴唇紅噹噹，就像膏到阿姆个胭脂，靚妮妮仔。

像搖三阪樣仔：指走路搖搖晃晃。桑仔乾：芒果乾。餳人：吸引人。蝲䗁牽絲：蜘蛛結網。準圓子lenˇ：當作彈珠在地上滾動。靚妮妮：形容漂亮的樣子。

「瑞珠嫲，阿婆當拜伯公翻轉身就毋看到你，ngai想你怕會來雜貨店，斷真就分ngai揣到咧！好魚好肉借嘴過，吞吞口水也過得。行，來去轉！」阿婆尋到來咧，牽起ngai个手，挷等ngai愛行走。

斷真：真的。團到：猜到。挷等：強拉著。

「遽遽走，頭家會罵；遽遽走，頭家會罵人喔！」ngai一片翻轉頭頸根挷長長看該列玻璃盎仔，一片心肝頭想，無買又緊看人个東西，驚怕頭家毋歡喜會罵人，就緊行走緊冷念。

遽遽走：趕快走開。

「ngai 仰會毋盼得，五角銀就買得著，細人就會暢到奈毋得；該央時你還係五歲子，哪個細人毋好食糖？你全無打潑賴，分ngai 牽等就走；阿婆食到恁老，想著心肝還會痛喔！」原來阿婆講該係二十零年前个事情。

暢到奈毋得：指高興得不得了。還細：還小。打潑賴：指小孩亂發脾氣。

「阿婆，無相干啦，少食糖正毋會蛀牙；你看ngai 个牙齒恁好，就係從細到大少食糖仔啦！」ngai 恁仰講，希望阿婆个心肝頭較自在兜仔，安心療養，身體遽遽好起來。

ngai 婆當省儉，一向都係打赤腳，在屋肚、隔壁鄰舍行上行下，只有愛坐車去街路个時節正會著鞋；轉到屋下，鞋就脫忒放到眠床下。ngai 識問佢：「大家都有著鞋，阿婆做麼个毋著鞋？」佢講：「省食有伸，省著有新。」ngai 婆有一個銀就愛鬥上十、有十個銀就愛鬥上百、係有幾百銀就愛貯落郵局肚生利息；在ngai 婆个身上，ngai學習到省儉个生活習慣。

脫忒：脫掉。省食有伸，省著有新：指省吃儉用就會富有起來。