早前幾年，我定定咧想，啥物時陣高雄亦會有一種交通工具，佇我想欲去某一个所在的時，就會當直接共我送去到遐。

因為彼時，我若是去臺北，無論我是欲去公館看讀大學的後生，抑是去士林找阿姐，或者是去新店參同款寫文章的朋友啉茶，甚至是去淡水看海、食阿給、魚酥、阿婆鐵卵，攏是一班捷運就會當到位。比起上早愛轉真濟班公車抑是客運，顛來倒去坐真久才到位的情形，大大的改變矣。臺北捷運予我快速、舒適、方便的感受。

自彼時開始，我有了一个夢。

有一日，佇高雄，我嘛會當享受坐捷運的美妙和快樂。

有夢，就有完成的時陣。

無偌久了後，果然，高雄嘛開始日夜趕工，為著建設閣卡便利的交通線－－高雄捷運。

高雄捷運直欲完成通車進前，高雄市政府文化局參高雄捷運公司共同舉辦一个徵文比賽「2007高雄捷運通車詩文徵選」，我嘛有寫一篇短短的文章去參加，彼篇參加的文章題目我就共伊訂做「直達車」，內容是按呢的。

「有沒有一條軌道，可以銜接陸地與海洋？

  有沒有一班列車，能夠載著城市居民直達幸福驛站？

  近來港都的巷弄間，傳來一陣陣喜悅的耳語，他們說快能走出壅塞的小街巷了。很快的，每一個人都將能迅速從泥土的香氣直達海浪撲堤的西子灣，幸福就會在軌道上散放開來。

  現在，我正凝視這條軌道，等著列車進站，送我到快樂邊岸。」

佇我寫出彼篇小品的文章了後，我就一直咧等候高雄捷運的通車，因為逐回臺北捷運載著我直接去到我欲去的所在的快樂，我相信高雄捷運嘛會仝款提供予高雄市民按呢的方便。

經過一陣仔施工的無方便了後，捷運紅線開始提供市民免費試坐。

有一暗食飽後，我和先生相招出門，阮兩人是真慎重欲去坐捷運。

先生騎歐兜麥載我先到後驛，然後阮綴後驛二號入口落去月臺，到底欲去小港抑是橋仔頭？阮兩人討論一時仔，我講來去小港機場看覓咧，先生講暗漠漠亦無欲坐飛行機嘛無欲去接人，去機場做啥？我想想咧嘛對，規去就來去三多商圈吧！這个提議先生無反對，阮就按呢踏入去落南的捷運車廂。

第一擺坐高雄捷運，有一種講袂出來的感覺，真新鮮真趣味，閣有一種人阮高雄這陣嘛有捷運的驕傲。總講一句，就是嘛會當大聲共別縣市的朋友展寶，講阮高雄不但有捷運，而且嘛真舒適。

彼暗，我和先生按照計畫坐到三多商圈，到站了後，捷運車廂一開門，阮就參其他仝款到三多商圈的市民作伙行出車廂，然後轉一个彎踅一个角，就看到直通大遠百的電梯，只要踏踮電梯面頂，就會當直接到大遠百，和卡早比起來方便真濟。

其實我無欲買物仔，干焦和先生一樓一樓四界看看咧踅踅咧，真緊阮就離開大遠百，阮閣按百貨公司的地下室直接落去捷運站，然後徛踮無仝方向的月臺，這擺阮兩人攏講好矣，直接坐到橋仔頭。

我戶口設佇高雄已經真久矣，毋過我猶毋捌去過橋仔頭，聽人講過橋仔頭糖廠的花真媠，過去因為歇睏日人濟容易塞車，先生上驚塞車，嘛才會攏無想欲去橋仔頭糖廠行行看看閣食一个枝仔冰。以後這種困擾消失矣，一班捷運就直接會當到橋仔頭，我想阮是會定定去的。

因為第一回捷運的體驗是佇免費試坐的暗暝，所以我和先生到橋仔頭站了後，干焦是踮月臺頂感受暗暝的風爾爾，若是真正欲遊賞橋仔頭糖廠的風光就留咧後擺日時才閣來囉。

曾經是我夢中直達車的高雄捷運，自試坐彼暝開始，已經真真正正駛入內我的生活中，後擺我想欲去佗位就攏毋是大問題矣。    

2016/12/19中華日報副刊