高雄市民使用的自來水，水源是按高屏溪引入來大貝湖，雖然大部分的市民攏是買水來啉，毋過生活所需要的水猶是離袂開對大貝湖邊仔的自來水廠送出來的水。

世界的人口愈來愈濟，每一个人每一日用的水大約兩百五十公升，咱臺灣人卻是用了兩百九十公升，比世界的平均數字加了四十公升，按另外一个角度來講，就是咱臺灣人用水卡浪費，無夠省水。

我會記得細漢時陣，洗米洗菜的水攏留踮洗碗桶仔。我問過阿祖，阿祖講愛卡儉咧，洗米洗菜的水會當洗碗、沃菜，彼時我攏感覺真麻煩，足濟年後我才知，卡早的人用洗米水去洗碗箸是因為會當去油，真正環保無污染。

我出世就有水道水通好用，毋知阿祖伊們以前攏是擔水轉來用的，伊們艱苦過，所以逐項攏真儉。飯是起火炭用烘爐煮出來的，佮後來的大同電鍋，甚至這馬的電子鍋當然是袂當同齊並論。

彼時，佇大隻飯鼎內底洗細粒細粒的米，欲共洗米水倒出來的時，攏嘛是愛一手按著飯鼎邊，另外一手為著無愛予米綴倒出去的洗米水流出去，手猶著做一個彎曲型，等咧接「漏出去的米」，毋閣毋管心內按怎提醒家己，猶是阿祖佮媽媽閣卡按怎「三叮嚀四交代」，攏嘛是會笨跤笨手予米有機會「溜酸」出去透氣。

發生按呢的情形就愛佇水槽內斟斟酌酌一粒一粒揀倒轉去飯鍋內底，阮是免痟想欲貧惰，就按呢予洗米水「順煞」佮彼幾粒「蠻皮」的米沖去洗碗的桶仔內底。

若予阿祖掠到的時（說實在的，遐是一定會予阿祖這個老先覺識破），免不了閣是愛予阿祖念一部經，阿祖會綴伊細漢「悲慘」的生活講起，講到作田人作田的艱苦，然後閣「恐嚇」阮講有飯通食的人若是「討債」打損物仔，是會予雷公摃死。我知影阿祖上大的目的，就是欲叫阮姊妹愛珍惜有水通用有飯通食的生活。

毋知是怕予掠去聽誦經，抑是阿祖佮媽媽一日過一日的教示有效果，阮也慢慢知影「一粥一飯當思來之不易」的道理，洗米的時陣著會慢慢仔洗，袂閣予任何一粒米「偷渡出境」，若是真然有「照顧袂周到」的米，嘛一定一粒粒甲揀起來用水沖沖咧，閣囥倒轉去飯鍋內底。

洗米干焦是煮飯的「前置作業」，飯若是欲煮甲香閣Q閣好食，水量佮烘爐火的大細是兩項重要因素。通常囥入去飯鍋內的水，是按照經驗來判斷。阿祖攏是講「將手壓踮米的頂頭，水淹過手目」就會使得。

這「手目」到底是「佗位」？

天才知影阿祖的「大隻手」佮阮姊妹的「細隻手」是毋仝款的，一開始阮攏嘛是掠袂準。

水量若是加了毋對，煮出來的飯毋是傷糊就是傷硬，但是這攏猶是小代誌。上慘的是，烘爐火若無注意，予伊傷猛，煮出來是一鼎臭火焦的飯皮，按呢就知死矣，阿祖佮媽媽的面頭前就愛頭犁犁聽經聽袂煞囉。

若真正有飯皮是欲按怎？閣會當按怎？照食。

阿祖佮媽媽將飯皮放佇手中心，然後用兩隻手搓搓咧，一粒圓圓的飯丸就做好矣，毋過按呢食白淡無味。有時陣阿祖會佇飯丸外口挲一點點仔鹽花仔，按呢食起來卡有滋味。三不五時阿祖猶會變一點仔「花樣」，飯丸上外口彼層挲淡薄仔糖粉，就變成下晡時仔阮腹肚飫的「點心」囉！

生活當中不管做啥攏需要水，每一日咱踮厝內水道頭一開就有水通用，方便的生活容易使人袂記得方便嘛是愛付出代價的。真濟年前我捌綴環保媽媽服務隊去參觀過臺灣省自來水公司第七區管理處，這个第七區管理處拄好佇大貝湖邊，水道公司按出水口將水引入來水廠，愛經過足濟擺手續過濾、消毒，了後才予清氣的水經過送水管送到每一戶。真濟人講高雄的水垃圾，有消毒水味，其實是高雄人有較敏感，毋過若是水源頭就卡垃圾，相對問題嘛會較濟，這是一定的。

水，是咱生活內底袂當欠缺的一項物仔，重要性佮空氣仝款。

對咱生命遮爾仔重要的水，咱啥物時陣珍惜過伊？

洗手洗面的時，水道頭開甲大大大，水放予流。流去的是啥？流去的毋是干焦水爾爾，流去的抑有金錢，這兩項攏是會當照顧閣卡濟生命的資源。

我愈來愈會當了解卡早阿祖惜水惜福的用意，這馬我嘛用洗菜的水沃花，洗身軀的水沖馬桶。

我愛惜珍貴的水資源，同時亦深深感謝，大貝湖的水陪伴我數十年。

2017/1/19台灣時報副刊