進入十二月了後，天氣一日一日涼冷，就卡有出門行行咧的打算，嘛卡會想欲去對我來講有淡薄仔遠的所在，比如西子灣。

西子灣是高雄西爿倚海的一个風景區，佇柴山西南方的山跤，佮旗津隔了一大片海面相向，是一个天然的海灣。上北爿倚柴山遐，是一个平平海岸佮沙子合起來的海水浴場，遐是一个以夕陽佮天然礁石出名的海灣。記載內底是講清朝初年，這个所在予人叫作洋路灣、洋子灣或者是斜灣，佇閩南語的讀音引導之下，斜仔灣漸漸變做西子灣，然後就一直到這馬攏按呢叫。

按呢看起來，閩南語嘛算是強勢的語言喔！

西子灣面對的是有夠開闊的臺灣海峽，遠遠看去一大片無盡頭的海，汝若來遮耍，無論是佇西子灣或者是爬起打狗英國領事館官邸面頂看落來，海，攏有無仝的面貌無仝的風光。

打狗英國領事館是西元1865年（清同治4年）2月，天利洋行佇西子灣邊哨船頭小山崙仔砌的全臺灣第一間西洋樓，是一棟英國式的建築，這个小山崙就佇

打狗港口北岸的鼓山面頂，西洋樓地基懸度離水面大約三十公尺，東爿、西爿佮南爿攏倚著真崎的山壁，北爿連著鼓山，是一个尻脊骿倚山、三面環水的形勢，當時英國掌理海關稅務的所在就設佇遮。

毋過，佇太平洋戰爭的時陣，打狗英國領事館這个建築物嘛有一部份遭遇到轟炸致使有損害，後來臺灣光復了後又閣拄到真濟擺風颱，規的建築四界攏歹了了，若親像荒廢矣。一直至西元1985年（民國74年）了後高雄市政府才開始一步步進行修復，自西元2003年（民國92年）開始，因為文化資產再利用的作法，使得英國領事館的府邸變成熱門的風景區。因此高雄市政府亦陸續將山跤的辦公室參爬山的古道公告做市定古蹟。西元2010年（民國99年）了後，因為做了整體的修復，所以是現此時臺灣唯一完整保存領事官邸、古道以及辦公室的重要古蹟群。

這馬有捷運，去西子灣真正方便，無像卡早綴我蹛的所在去西子灣愛轉兩班公車，閣加上等車的時間，去一擺西子灣就愛費去袂少的時間。這馬無仝矣，坐橘子色這線的捷運，坐到上尾站就是西子灣站。若是按一號出口行出去，直接行臨海二路，就會當行去中山大學，若是越左手爿行哨船街，就會先行到山跤的領事辦公室，遊客會當按遮買門票入去參觀，然後順著山勢古道爬去山頂的領事官邸；遊客嘛會當繼續向前行，行去領事館官邸彼爿，才按遐買票入去參觀。

猶記得民國八十三年我選讀中山大學中文研究所的六朝文學，彼个課安排佇拜四透早八點開始上課，彼冬陣攏是先生開車送我到中山大學的磅空外口，落車了後先生開翻頭轉去上班，我就行彼條長長的磅空，然後去文學院上課。彼門課上完我另外閣去聽一門課，到中晝十二點下課，閣一擺行光線暗暗空氣涼涼的磅空，等到行出到磅空口的時陣，攏有一種若親像綴古早時代轉來到現代的錯覺。

我是書生嗎？

毋過，我無書僮嘛無馬通騎。

我是現代讀冊人，我愛徛踮接近渡船頭的公車牌仔跤等候公車，毋管好天抑是落雨天，仝款攏是攑一支雨傘，好天遮日落雨天遮雨。定定是轉兩班公車轉到厝攏已經超過下晡一點矣。好佳哉彼个時陣我規的心佇讀冊聽課，就毋捌有無方便的感覺，反倒轉定定佇等公車的時陣看向哈瑪星渡船頭，看遐的船、鼻港口海水的味，有時陣嘛會產生一種講袂清楚的感覺，是遐爾仔特別遐爾仔無仝。

講到西子灣這个磅空，是佇西元1927年（昭和2年，民國16年）日本人海野三次郎負責砌的，這个磅空鑽過柴山，西元1933年（昭和8年，民國22年）正式使用，日本時代共伊叫做「壽山洞」。第二次世界大戰美軍大規模轟炸臺灣的時，曾經改作防空壕來使用。目前西子灣磅空是連接西子灣、中山大學佮哈瑪星的重要道路，而且因為磅空的景致特別，因此一直是高雄有名的觀光點。

十二月的第一个拜六，我參先生早早就討論好欲坐捷運去西子灣。彼日早起逐項代誌攏處理好勢了後，阮就相招出門。離阮厝上近的捷運站是衛武營，四號五號出口攏會使入去，去西子灣坐這線拄拄仔好免換車，而且閣是坐到上尾站。到位出站了後，先生建議行中山大學彼个磅空，先入去中山大學行行咧，然後阮沿海岸行，一爿山景一爿海景看甲真歡喜，行到英國領事館官邸，攑頭看向山頂的西洋樓仔，邊仔閣有十八王公廟，一時間煞想攏無，這是啥物情形？

啊！俗語毋是講既來之則安之，這毋定就是中西合璧嘛！

遐的彎來越去的樓梯袂少層，等到我參先生爬去到面頂，看向大海的時，規个人的心攏開闊起來，拄才西方中式的結自然就打開矣。

風微微仔吹，踮英國領事館官邸二樓走廊遐食餐食下埔茶，雄雄叫是穿越時空轉去古早時代，憨神憨神的我煞袂記得這馬是民國105年年尾矣。等到先生話一聲「來轉矣」，我回魂過來家己想著嘛愛笑。

然後，阮落山，慢慢仔行。

轉去的時我共先生參詳行哨船街這爿，行過雄鎮北門，閣行過哨船頭公園，哈瑪星渡船頭就佇目睭前，參卡早無仝的是這馬的渡船頭加一條像彎彎月娘的景觀橋，我就是行這條真媠的橋過去接臨海一路。

行啊行，當阮行到捷運西子灣一號出口時，我才發現，原來阮甲西子灣踅一圈矣。

趣味麼？欲閣來莫？

那著閣講？當然嘛是欲。

2017/03/03 中華日報副刊