自從高雄捷運開始施工到開放予市民試坐一直到通車，我攏毋捌想過有一日我會是固定坐捷運的人客。

甚至，我應該講，自從我結婚戶籍設佇高雄了後，我真罕咧去到我所住的三民區以外的區域。阮兜附近的鳳山、苓雅、左營這幾區，我經過的機率卡懸，若是前鎮這區，我從來就無想到我會去遐，而且閣是定定去。

對我來講，前鎮是真生份的所在，我對這區不但無任何的概念，甚且會使講是一無所知。

毋過生活袂是一成不變，生命嘛會佇巧妙的時陣轉一个彎踅一个角。

兩千空八年十月初一拜三，我第一擺越區，按高雄的北爿去到南爿的前鎮。因為我接下慈善協會為前鎮地區弱勢家庭的囝仔所做的希望工程，我去教囝仔作文。

我的前鎮初體驗，就予我深深甲意著港都南爿的這區，我恨不得時間會當倒流轉去，予我早幾年就發現前鎮樸實的媠。

接這个工作進前，我請教過慈善協會的社工，我欲去的國小是佇佗一條路，倚佗一个捷運站，然後我去網路詳細查坐車的資料。佇心內有一个大概方向了後，我充滿期待，欲去參囝仔歡喜相逢囉。

雖然我對生份的前鎮一無所知，但是因為欲去的小學佮前鎮高中是相隔壁，因此我選擇坐到前鎮高中這站，再閣按3號出口爬出去。無想到我按呢用想的紙上作業，竟然嘛找到一條上方便上快速的路，出了捷運站，只要行五分鐘就到我欲去的小學。

更加使人滿意的是，這猶閣是一條足會當欣賞風景的路！

這又閣是按怎講呢？

我所行的這一條路，左手爿就是真有歷史的前鎮高中，道路邊仔的學校內底四界攏是大欉樹仔，攑頭就是一片青青青，心肝頭佇彼个短短時間就安靜落來，有冬時仔老師講課的聲音閣會逐著我的腳步來，一時間予我懷念起我的青春少年時，毋定我若越頭，就會當看到彼當年頭毛短短的我。

人生上快樂的時光，就是佇讀冊階段，無煩無惱干焦需要佇知識寶殿內底認真就會使得。學生按呢的一个角色，我抑想欲重來一擺。不知不覺我的腳步愈踏愈慢，若親像腳步一慢落來，青春時光就會當閣轉來，予我閣溫習一回讀冊人的趣味。

毋過拄咧行路的我，是欲去某一个小學，陪伴一寡囝仔做伙學習，教室內底小小的桌仔椅仔攏已經毋是為有淡薄仔年紀的我所準備。那按呢，直欲徛佇黑板頭前的我，欲按怎打開囝仔想的窗仔？日頭、老樹仔惦惦無講話，中晝的惦靜佇歐兜麥騎過時破一个孔，我就按呢明白矣。

攑一支小雨傘遮日的我，自自在在行佇前鎮高中外口的柴頭道路面頂，細隻膨鼠有時陣出現一下，予我的心情漸漸歡喜起來。佮前鎮高中隔一條街的小學，真緊就出現佇我的目睭前，我按照社工共我講的教室找去，一看，教室內底坐甲滿滿滿，予我小小驚惶一下。

初次見面，佇簡單的自我介紹了後，我愉快用國語共囝仔講，「從今天開始，每個星期三下午我們都會見面，再一起來學習作文……」

二十幾个囝仔的個性一定是無仝，活潑的、大方的、勇敢的囝仔，開始相爭問話：「那要寫作文囉？」

「是的，很容易的。」我簡單回答，無想欲初次見面就共囝仔驚到。

「哪是？很難的。」

「嗯啊，作文要寫很多字呢！」

「我不喜歡寫作文。」

「我不要寫……」

一時間教室內底攏是囝仔的聲，除了遮的以外，猶有結目頭、翹喙、越頭踅爿，以及各種姿勢攏有，看起來遮的囝仔攏無愛寫字。

囝仔佇第一擺見面就遮爾仔坦白，雖然慈善協會的社工感覺歹勢，毋過我卻是因此閣卡清楚囝仔的想法。另外一方面，我嘛佇我的心肝內共家己加油鼓勵，相信我家己做會到，予遮的囝仔袂閣再討厭寫作文，甚至我亦期望家己，愛共伊們大家攏教甲歡喜讀冊參寫字的地步。

我就按呢開始我前鎮教作文的生活，嘛變成了高雄捷運紅線的固定人客，每擺只要一過拜一，我就盼望拜三緊來，拜三是我去前鎮的日子，是我參二十幾个囝仔見面的日子，我真愛行佇小學外口彼个彩虹步道面頂的感覺，我嘛真愛教室內底的氣氛，我相信遮的囝仔終其尾一定會甲意寫作文這項代誌。

2016/10/14 台灣時報副刊