秋天來矣。

十月中彼个禮拜六下晡，我去前鎮喜菡老師的工作室參加「南方的風」論壇。

三點鐘真緊就過去矣，五點外，我欲轉去三民區，行佇民權路邊，懸懸的樹仔搖出來一陣一陣涼涼的風。

啊，秋天來矣。

這款涼絲仔涼絲的黃昏時，行傷緊真拍損，愛慢慢仔行、慢慢仔享受。

秋天的媠、秋天的風采，參其他三个季節是遮爾仔無仝，若無細膩感受觀察，恐驚亦是憨神憨神就放予過去，一條路行過了後，猶毋知秋天就佇汝身軀邊踅玲瑯呢。

拄好我這个人，生來就容易因為一點仔風一點仔景，就家己歡喜甲吹風賞景，然後愈想愈遠愈想愈濟，想到尾仔有可能想的攏已經參風參景無關係矣。

到底這款現象是好抑䆀？我亦毋知影。

像彼一日，我吹著風絲仔，吹啊吹，煞規頭殼攏想去前鎮這區為啥物號做是前鎮？

了後我去查資料，才知前鎮這个地名的由來有三種講法，分別是明朝末年水師中軍是由鄭成功統領，伊旗下分做前、後、中、左、右五个提督，這五个提督後來變成明鄭政權最懸的軍事單位。五个提督之下閣分了前、後、左、右、中五鎮，其中的中提督前鎮安營在此地，所以才會將這个所在號做「前鎮」。第二種講法是講明鄭時期鄭成功為了防止西洋人閣再侵入臺灣，所以佇紅毛港設了前哨，另外閣佇草衙設衙門，草衙是一个小衙門，前鎮就是草衙頭前的鎮營守地。第三種講法是清朝時陣這个所在土匪真濟，府縣就派兵鎮守這个所在，因此才有前鎮這个名。一般人攏卡相信第一種講法，比較上卡合情合理。

朝代改變到今仔日，若無去斟酌地名的來源，亦是無法度清楚彼个變化。

是講我行就行，何必去想地名的由來。佗一項代誌佗一个所在佗一個人，無伊上早的開始？

歷史的由來，咱做不了主，毋過，佇車輛真濟的民權路頂，家己一个惦靜惦靜那行那欣賞秋色那吹秋風，這是別人袂當阻擋的一點點仔幸福。

我欲按怎行按怎看按怎聽按怎笑，無人會當指使我，我，是我家己的主人。

我並毋是刁工欲行這段路，我是因為欲去捷運獅甲站坐捷運，幸運拄好拄著微微仔風對面吹來。當下一想，按鄭和路行出來，這一段路毋偌遠，我就毋通行傷緊，我愛慢慢仔行，才袂一時仔久就行到獅甲站，按呢，才會當加體會一咧仔秋天的感覺。

民權路真開闊，兩爿邊仔攏有行道樹，風吹過樹尾搖袂停，是樹仔咧弄獅嗎？

我是按怎會按呢問？因為獅甲這个地名真正佮弄獅有關係。

戲獅甲倚佇前鎮區的西北爿，清朝時代劃入去大竹里戲獅甲莊，因為地形倚海，早期定定有海賊來侵犯，所以家家戶戶佇農事吳閒煞了後，用畚箕當做獅仔頭消遣娛樂，娛樂別人嘛娛樂家己，利用武術行勢配合宋江陣的陣局，毋但鍛鍊身體閣會當抵抗海賊的侵犯。

如今的獅甲就是因為按呢而來的，這有真深的時代意義。雖然來到二十一世紀的今仔日，已經無需要抵抗海賊，毋過因為過去的歷史背景所留落來的在地特有的弄獅文化，亦是會當反映打狗這个城市的靈魂佮內涵，對各區之間的交流嘛真有幫助。

佇打狗，有「北萬年、南獅甲」的兩个地方民俗文化活動。一个是北高雄的左營萬年季活動，另外一个是南高雄的戲獅甲文化節。戶口設佇高雄遮濟年，我猶毋捌佇這兩个活動進行的時陣，去到現場親身體會，講起來，這嘛是我生活的不足，若有機會，真正愛近距離來欣賞。

我想，弄獅，一定真有看頭。

佇我行過民權路的時，干焦樹仔的嘻嘻嘩嘩就袂輸弄獅陣。

我知影，秋天來矣。

風，直欲吹起戲獅甲的活動矣！