中秋節日子落佇

連續假期的上尾工

陪伴序大人過中秋暝的序細

的確無濟

我無佇父母身邊

囡仔嘛佇中秋倚晝

坐車去台北

車那行那遠、心愈揪愈懸……………

 ＊　　　＊　　　＊

這粒戇老母的心

毋知底時才學會曉放下？

＊　　　＊　　　＊

尾暗仔

去斜對面看厝邊詹太太整理花草

參伊開講

才發覺講，厝邊隔壁每一的家庭

攏有囡仔離開身邊的經驗

＊　　　＊　　　＊　

開講時，閣行倚一位媽媽

嘛有兩個查某囡仔出外讀冊

伊的煩惱閣較濟

學校佇山頂

查某囡仔無抽著宿舍

伊足煩惱囡仔的安全問題

聽怹講煞

才知影

毋是干單我的囡仔會大漢出外

毋拘，我哪會即久才知影

逐工相拄笑頭笑面的怹

原來嘛有一粒想囝的心肝

＊　　　＊　　　＊　

這時陣

月娘突然間唯雲裡踜出來

月圓、月缺年年仝

佇中秋看著月娘

就會加寡仔歡喜的心情

想講：轉來厝裡叫囡仔出來看月娘

啊！又閣戇想矣！

囡仔無佇厝裡啊！

＊　　　＊　　　＊　

天暗落來了後

一葩一葩煙火的花

開佇天頂，足嫷、足嫷！

又閣斡頭

想欲叫囡仔看嫷嫷嫷的

煙火開花……

啊！又閣戇想矣！

＊　　　＊　　　＊　

拜託月娘

看顧他鄉阮的囝

這、毋是戇想！

因為我知影

盈暗

有一粒光光光的月娘

照著遠遠的北台灣！