求醫的路，真歹行(台文)

2020.12.21

早起阿勳申請縣府的復康巴士，對斗六坐去台大虎尾院區。

照往過坐復康的經驗，落車進前司機先生會提一張伊的電話號碼予阮，若是治療結束，敲電話予伊，伊就會閣過來病院載阮轉去厝裡。

早起阿勳請個別助理陪伴就醫，所以我無綴。

轉來的時，阿勳共我講伊坐車拄著的問題，我聽著誠毋甘。

伊請問司機先生電話號碼的時，司機講若欲轉來的時，才閣敲電話去縣府，縣府會調派佇附近的車輛來載。

阿勳共伊講，護理人員共藥仔灌入去身軀了後，一點鐘內底，著倒眠床，（15分鐘翻一遍身軀），藥仔才會當發揮作用。驚仔重申請，調來車輛時間袂按算，藥效卻有時間性的限制。

司機應講，應該佇病院倒啊，哪有人轉去厝裡才倒眠床？

無毋著，阮嘛捌要求病院，敢會使佇病院完成才轉去。

醫護人員講，病院無遐濟病床予人使用。

所以，這是病院的規定，毋是阮有法度改變的。

阿勳共司機講，你若無方便，無要緊啦，到時我才家已倩車轉去。

佳哉司機聽阿勳講出伊的困難，有共電話號碼予伊，嘛順利佇一點鐘內底轉來到厝。

講真的！

毋是阮貪著免費的復康，實在是當當身體無爽快的時，上、落車徙位對阮來講誠困難。

是按呢.....

中秋進前，阿勳入院動手術。中秋了後，囡仔轉來，拄好載伊出院。

到厝予怹爸爸落車，囡仔才出去加一个油爾，轉來就隨閣載怹爸爸去台大斗六院區急診。

因為阮［跛跤］，徙位無跤通鬥出力，用手撐，身軀袂當順利綴咧徙，著出真大的力。就按呢，開刀的空喙就出血，血角塞著尿管，尿無法度排出來，人誠艱苦。

二姐佮囡仔兩人協助阿勳上車，車細隻、無跤路，無好出力，舞一睏，到病院落車又閣舞一睏。

彼遍，醫護人員真緊解決阿勳的症頭。

留佇急診室觀察的時，阮要求病院，因為跤無方便，徙位困難，驚仔下力空喙閣出血，血角塞著尿管的情形閣發生，敢會使閣予阮蹛院？

病院講，若按呢就蹛院，起偌濟病院嘛無夠用。若有狀況才閣來急診就好矣。

阮會當理解病院欠病床的情形。是講，醫生應該袂了解袂行的阮，的困難。

第1遍急診了的第2工，囡仔看怹阿爸順順，就閣坐火車去北部準備上班。

第3工，連續假期的尾日，阿勳又閣有狀況，佳哉二姐抑未轉去中壢，緊叫車送急診。

看阿勳面仔憂憂憂，伊誠gâu忍，我知影伊定著真艱苦。偏偏仔起落車遐呢困難（這時陣若有復康車，輪椅直接坐起哩，會減輕真濟痛苦），連續假日上尾工，路裡又閣塞車。

叫車用講價的，一tsuā（趟）200箍。落車的時，司機先生恬恬仔提20箍予我，共我講：百八就好。

伊看出阮的困難(毋是錢項上的困難)，20箍tēnn佇手裡，有溫暖的熱度。

假日尾工的急診室，來急診的人有夠濟。兩个床位的空間，tsinn入來 3張病床，醫護人員傱來傱去，阿勳坐佇輪椅等真久才有病床通倒。這遍替伊處理的，毋是專業護理人員，是助理。尿管重插兩遍，用兩、三點鐘等待、處理。毋若尿無流出來，外口閣插甲流血流滴。若是專業人員來處理，插尿管無應該流血啊。毋拘無法度，破病無撿是毋是假日，啊閣較專業的醫護人員，嘛著歇睏。

護理人員無步矣，就敲電話共當咧放假的主治醫生請示。

結果是….閣轉去虎尾院區蹛院敢好？

無欲按怎？

病院安排欲去虎尾的救護車，干但會當坐患者佮一个家屬。病院嘛干但會當留一个陪伴的人。二姐參阿勳坐救護車去虎尾。

我咧？坐計程仔轉厝？

半暝仔得欲12點，驚是另外一个心情，這條困難的路，需要有人參我做伴。

羅老師幾年前對斗南搬來斗六的時，就共我講，咱今做厝邊仔，若有代誌需要幫忙，免客氣，共我講一聲。（其實離誠遠，我蹛東爿伊蹛西爿）。

這時陣，我就無客氣電話敲予伊，麻煩伊開車來載我轉厝裡。

路裡，聽伊講起我才知，彼工伊拄好去外縣市參加騎鐵馬仔的活動，一定是真忝，毋拘聽著我需要伊載，無第2句話就答應。

開車來載我的時，車底閣替我儹食的，伊講我知影妳應該枵矣。

濟濟的溫暖陪伴，像阮的二姐仔、阿勳蹛院的時，來遮蹛二十外工陪伴阮，後來轉去做工課，愈想愈袂放心，又閣來斗六看阮、像羅老師，伊講閣較晏攏無要緊，伊一定會過來載我。有怹伴阮行過風風雨雨。除了感謝、猶是感謝！

阮嘛足想欲憑家己的力量解決困難。所以我認真揣資料，想欲家己出錢倩車就醫，毋拘我所揣著的，雲林縣干但兩台無障礙的計程車咧營業，而且兩台車司機本身攏是殘障者。欲倩怹出車，時間上有時陣真僫配合。

政府的德政，予阮需要的時會當申請無障礙的車輛載阮出入。

駛復康車輛的司機先生，攏真有耐心、有愛心咧幫助阮。

若是佇緊急的時陣，會當揣著像計程車遐方便的無障礙車輛，毋免預約、毋免申請，就會當倩著車，毋知欲偌好咧！

因為病疼欲來的時陣，嘛攏無事先參阮約定啊！