病院安安靜靜、長長光光的走廊，夜間候診無半人；醫生講新正年頭人較少，吩咐我後禮拜毋免siuⁿ早到，患者若濟聽候了時間。

提藥仔窗仔口嘛無人，藥師小姐親切閣溫暖，共我解說［救心］服用的方法。

［救心］；這个藥名聽佇耳空裡，啊！我又閣綴牢著阮阿母的跤步矣。

會記得彼時猶蹛庄跤，伊呀lám-sin，拖命khînn家真操勞，佳哉柴櫥仔內底有［救心］，含一粒佇喙裡，救伊幾何擺脫危急。……

 先講我汰會袂上班，新正年頭就走夜診？

 定定講人無了解我，其實，連我都無了解家己，才會舞甲遮費氣。

毋知當時開始，半暝仔三、四點大氣喘袂離；一直掠準是鼻仔倒流來引起，嘛定定共治療鼻病的中醫師complain，藥仔食遮久，暝時猶是為著鼻仔睏袂去；醫生講：愛有耐心！

 半個月前彼个半暝仔，氣、又閣喘袂好勢；毋拘鼻仔無塞咧啊？！

這个發現予我知著驚，警覺著這應該毋是鼻仔的問題。

 共中醫師反應這个現象，醫生［望、聞、問、切］了講：有可能是心血管的問題，先開藥仔食看咧。

 這个過年，囡仔轉來的時我共講，無欲像往年按呢煮一堆，過年了才khêng袂去，伊講無差，彼寡仔年菜伊嘛無愛食，毋拘伊閣問我：啊佛跳牆有欲煮否？

佛跳牆囡仔無愛食，翁婿叫我免煮；我猶是欲煮，因為翁婿愛這味，我一年嘛才煮一遍予食爾，我袂使貧惰。

囡仔嘛講：這項愛煮。

是按怎？

伊講：驚汝老人痴呆去。

 除夕彼中晝，看囡仔共門聯貼好，想欲開始去灶跤款暗頓，感覺人sian7- sian7，tō先去眠床theⁿ一下；人倒佇眠床，心卻是佇灶跤咧無閒，愈倒心愈急，規氣起來。

 手那款、心那著急；汰會按呢？我是咧緊張啥？！

心肝空空、跤手浮浮。血壓量看咧；夭壽哦178。

囡仔講：媽仔汝是咧急啥？阮抑毋是像阿公，一定愛六點食暗頓。

阮大官食飯時間真準時，毋拘伊無來蹛遮啊！

無用頭殼思考怎樣配料的數量，攏總共伊落落去鍋仔，下落電鍋煮，共怹父仔囝講盈暗較晏食哦，人真無爽快，欲來歇一下；心內想講：這敢會是我煮予怹食最後一鼎的佛跳牆？！ 

厝裡便若有人身體若雄雄出問題，攏會打電話問開藥局的同學蔡藥師；我khà予伊的時，雖然伊當咧圍爐，嘛是耐心指導我用藥仔，建議我降血壓的藥仔食落，歇一下，半點外鐘症頭應該會回落來。 

因為規身軀真無爽快，問囡仔講：食兩粒好否？較緊！

伊緊張講：袂使得啦！無、敢欲叫救護車？！

呵…其實我是參伊講笑；囡仔嘛是藥師呢，有伊佇厝裡，雖然身體艱苦，內心是無驚惶的。 

藥仔食了睏點外鐘，症頭減輕有八成矣。 

精神的時聽著翁婿共囡仔講：喂、來看恁媽媽一下。

我聽著應講：好真濟矣啦！

驚我無喘氣？ 

食暗頓的時，已經欲八點矣。

半講耍笑吩咐囡仔講：媽媽若雄雄無氣，毋通隨共我捒去冰哦，我驚仔猶有感覺，會寒！

囡仔講：會寒愛講啊！

悾的！若會講話汰會叫做［死去！］

過年過節講遮的話，若予阮母仔聽著會罵：提屎蓖共汝koeh落去！ 

囡仔講我真蠻皮，攏boăi做檢查。

無啊！其實我做過心電圖，都講無各樣。

我總是按呢想，人攏會致著一種病來離開世間，啥病來tshuā我去，我就去。 

阮囝講伊有一个朋友，心肝頭無爽快，去做心電圖講無按怎，尾矣閣進一步去做心臟超音波，發現心血管梗塞，隨手術！ 

自會捌代誌到今，我拒絕過幾何擺手術；頭一遍是國校仔四年去考仁愛學校，錄取通知單有但書，寫講跤愛去手術穿鐵鞋才會使去讀；我無去手術，毋但是毋甘阿母閣為我開錢，我欲去讀仁愛學校的時，厝裡無錢，佇國校仔教冊的表叔講欲去替阮募款，阮阿母講毋通按呢，按呢我一世人（lâng）人（jîn）情債還袂完，就招一陣會仔予我去讀仁愛學校。我若閣去手術，阮阿母一定會去khêng錢，毋拘、伊是愛還到當時啊！？

嘛因為若手術著愛閣歇一年，為著等少我兩歲的小妹仔同齊讀冊，我已經是［超齡］的學生，細漢時若考第一名，轉來咧展，叔伯阿兄（嘛是我同學的爸爸）攏會講：汝比人較濟歲，無讀第1名，無是欲讀第幾名？

雖然無手術，有做一隻鐵鞋穿起來，就嘛是去仁愛學校讀冊。 

高中畢業了後佇淡水上班彼幾年，嚨喉定定發炎，差不多每個月攏會去耳鼻科，醫生建議我手術共【扁桃腺】割掉，就袂定定發炎；我無去。

嫁來雲林，有一站仔嚨喉閣發炎，本地上大間的病院，醫生嘛是叫我手術，我躊躇真久，伊閣khà電話來催；我猶是拒絕。 

這幾年予鼻病舞甲影響睏眠，去看醫生，醫生一看，隨安排時日欲共我開刀，伊講這若無開刀，是袂斷根的；我想著大姐夫從伊參阿姐結婚到今，鼻仔開過3遍；若是開刀會斷根，汰會一、二十年開3遍？！ 

我一直毋相信，敢一定著攑一支刀來對付我身軀內底的［人客］？

有啦、有一遍，彼是開刀共我彼个寶貝仔囝抱出來。

拒絕手術的歷使，講予囡仔聽。

伊一半著急、一半關心講：準講這遍檢查出來著手術，汝嘛無愛？

會、我會接受。

因為若是心血管的症頭有危險性

我驚死、閣較驚會連累人的［半死］！所以新正年頭未上班，病院一開門就緊來掛號………。 

檢查結果抑未出來，但是我有自信，一定會當閣煮幾何鼎的［佛跳牆］，煮予規厝間芳kòng-kòng，煮予過年的味一直傳落去………！ 

這篇文章lò-lò長，請你毋通嫌我厚話，我是欲講予家己聽！

2014.02.06