今仔日請休假，早起圓仔拜了，參翁婿兩人去看中醫師；伊是暝時睏眠品質無好，欠眠定會引起頭眩。

我是鼻水倒流，睏眠袂好勢。天氣若涼冷，鼻仔就九怪。食西藥會愛睏，所以一直攏食漢藥望欲改善。

醫生今仔日共我講，我的扁桃腺真大粒，所以暗時鼻水略略仔倒流，就會感覺袂爽快。

伊按呢講，我才想起這款症頭佇做查仔囡仔時，因為定定嚨喉發炎，一位耳鼻科醫生講我扁桃腺較大粒，伊叫我去大病院將扁桃腺割掉。彼時無接受手術的建議。後來結婚了後，嘛捌有大病院的醫生建議我將扁桃腺割掉，我猶是無接受，病院特別打電話來，問我哪無去做手術。

遐已經是一、二十年前的代誌矣，無接受手術嘛是活到這當今敢毋是。

今仔日醫生若無講起我扁桃腺比別人較大粒，我已經袂記得家己有這咧症頭矣。

………..   …………..  ………..

下晡閒閒翁婿開車載我四界踅踅咧，坐佇車底，想講嚨喉這粒【扁桃】，即馬大概變做【圓桃】矣吧？申手唯頷頸嚨喉的所在搓搓咧。咦？哪會按呢，有一種像注過麻射彼種麻麻、無真實感的現象。敢是真嚴重矣？嚴重甲漸漸失去感覺？敢會按呢？

管汰伊，毋是一直共家已講，人、一定會有一種方式結束人生，來就來吧、莫予我傷疼就好。

幾何擺想欲開喙（嘴）共伊講：老的、我可能愛先來走矣。

曾經參伊笑談身後事；讓我先走……、伊講這毋是咱人有才調決定的；伊講我若先走，伊頭眩症頭若來，誰欲幫伊提藥仔？

看伊全精神認真開車，抑是莫驚伊。

………  ………  ………

盈暗欲洗身軀時，看著浴間仔塗跤一條絲仔巾……搓一下仔我的頷頸、真實感轉來矣。

原來、寒天我有圍絲仔巾的習慣，下晡佇車底是隔著一層絲仔巾搓頷頸……一定是按呢。為著欲證實我的推想，共塗跤的絲仔巾抾起來圍咧、閣搓看咧…果然無錯。

這、敢會使講是：思想創造虛相。

～菩提本無樹啊～