2014.09.06寫

下晡欲去市內買物件，歇睏日，跤步會當寬寬仔行。

機車騎經過小路仔，田園的秧仔最近換一領青piàng-piàng的新衫、白翎鷥覕佇田中央，一時仔舉頭謝天、一時仔lê頭食物。怹可能嘛歇假，跤步慢慢仔踏，無趕暗、無趕早。

機車經過大學路，又閣nǹg入來另外一坵田的田岸仔路。

佇秧仔跤有一隻身穿白衫套烏裌仔的鳥仔，是我毋捌看過的鳥隻。

我共機車停落來，欣賞這隻穿插遮特殊的鳥仔。

伊用身軀去弄秧仔，歇佇秧仔內底的蠓蟲會飛出來，這隻鳥仔飛懸就共蠓蟲啄去食，跤手真扭掠，看伊表演一睏仔，毋知是毌是無歡喜我無共拍噗仔，就無愛耍，斡頭飛走去矣。

頂站仔佇網路，董老師（育儒。夢生）捌提起糞埽鳥仔，想起伊的形容，應該就是這。

這爾媠的鳥仔，汰會號做糞埽鳥仔？

轉來到厝，查網路的相片，伊的正名號做白鶺鴒【pe̍h-tsik-ling5】、嘛有人叫伊牛屎鳥仔。會號歹聽的偏名，大概參伊生活習慣有關吧？我按呢想。

若是鳥仔，我攏合意。怹唱的歌好聽、怹飛的姿勢好看。除了暝時唱歌真歹聽，又閣逐暝來攪吵彼種鳥仔以外。

我總是真好運，無張無持就會予我遇著鳥隻好看的身影。

以早一位同事定去爬山運動，捌共我形容八色鳥的可愛佮美麗。伊講彼種鳥仔攏覕佇較挹貼【iap-thiap】的所在，伊是佇山內才看會著。我袂曉爬山、去到佗閣是一台戰車大大聲，伊講我可能無機會看著八色鳥。

湖山水庫用地徵收了後、未建進前，一遍我開車載朋友一行三、四名，直駛到［庫底］看風景，返頭朋友報我開車去伊朋友以早開店的所在，是一个啉咖啡、看風景、聽鳥仔唱歌的好所在。彼時已經無咖啡通啉、風景佮鳥聲原在。

我共車停佇停業的咖啡店頭前，看著路邊一排人，鏡頭chhāi咧【立著】細細聲仔咧講話，原來怹咧等八色鳥出岫，欲翕相。

我參朋友行倚，都無五分鐘咧，人聲chhi-chhi-chhú-chhú緊張咧交談；原來，孵卵的鳥母出岫嘍，飛落來塗跤咧抾食。

阮看著矣、阮看著矣。

看八色鳥飛走的時，尾溜紅色的毛草，像穿一領紅色的細領內褲，有夠趣味、有夠古錐。

翕相的人講怹來自南北二路，有的人等幾何工才等著，阮煞遮爾簡單就看著。

有影；我總是遮好運。

今仔日閣熟悉一个新朋友......糞埽鳥！

雖然名字無好聽、毋拘伊生做真媠；希望後擺伊會有一个較好聽的名。

(相片擷自網路)