頭殼疼成十工矣
醫生講是睏無好勢引起的。
若按呢，就睏吧！
最近攏早早睏、晏晏起，完全是貧惰新婦的款式。

睏濟、煞厚夢。

中秋過了一个暗頭仔，參二姐講電話。
講著月娘真美麗、講著阿娘七、八十歲有一暝，佇五樓頂hiàm二姐，共伊講月娘真媠真大个。二姐手咧無閒，無隨起哩。

等甲做閒欲去睏，看著天頂的月娘有影媠，無隨起來伴阿娘看月娘，內心感覺略略仔歹勢；一下歹勢、歹勢到即當今。

今、阿娘蹛天頂，看的月娘大概閣較明！

原來，七、八十歲的阿娘，宛若有浪漫的心情。
按呢、就袂當講我是無藥可救的浪漫者嘍。

參二姐講煞，就去睏。

夢中……..
毋知轉去佗一年代。
我參囡仔佮囡仔的阿爸蹛二樓。

暝時欲睏進前，看唯樓跤，黃色的燈光；問囡仔欲睏哪無關電火？
囡仔應講：「阿公拄轉來！」
彼是阿爸蹛樓跤、阮蹛樓頂的氣氛。

阿爸拄出外轉來，咧換厝內穿的衫，喙裡哪唸歌。

阮阿爸年老的時，出外一向穿料身真好的衫褲，整理甲真pih-tsah【穿衫打扮整齊】，伊捌講，老人hiàn（羶）人都咧嫌矣，若閣無穿較整齊咧，會變做無受歡迎的老人。

我未出嫁時，上班轉來到厝就是等食飯爾，毋捌做家事。一軀衫自早起穿到暗。

結婚了，阿爸捌來遮過暝；看我一軀衫穿出外、仝一軀衫入灶跤。
伊共我講，出外的衫佮厝裡穿的愛分開，毋通一領衫抑欲做禮數、抑咧做桌布。

夢醒；無阿爸，囡仔嘛無佇身軀邊，干單枕頭邊老翁仔睏甲誠落眠。

夢裡有阿爸、夢醒煞想起阮阿娘。

想起伊看著媠媠的月娘無人分享…..

想起我一遍的中秋暝

巷仔口看唯東爿山，月娘媠甲親像鏡。
緊入來厝內叫翁、叫囝出去看。

怹一个顧做空課、一个顧耍電腦，無人有動靜想欲出去看覓咧。

巷仔口的月娘就放伊佇遐家已媠、無人看。

我佇音響囥一塊阿爸愛聽的演歌，聽甲目箍澹、聽甲心槽亂。彼時父母攏閣佇咧，心情不對，會拍電話參怹sai-nai【撒嬌】。

無人欲伴我浪漫的孤單，自然是投予阿爸聽。
毋知講…..彼時阿母參我共款的孤單。

唉！人生一路行落來，底時袂孤單？抑是緊睏較袂頭殼疼。

逐工睏遮飽、若閣頭殼疼，tŏaⁿ著（大概要）來去拆醫生的かんばん【看板】矣！