住洋樓，養番狗，細個成日聽到大人咁講。

來到台灣，就唔好再住高樓大廈(大樓公寓)，買一幢先係理想。二線或南部城市中古屋四五百萬都有可能，但必須花心思花錢裝修。如果搵設計師，二百萬走唔甩，而且冇分期付款。不過怕比人呃拖工的話，搵設計師穩陣。

透天厝，似香港唐樓或者村屋成幢，一般都係黐著人地，可以感受下台式人情味甜酸苦辣。

睇中了，同業主討價還價，呢度習慣先比幾萬斡旋金，以表誠意，傾唔成會還，不過聽過有地產佬(房仲)不肯還，一直拉人睇樓(看房)。菠蘿油認為唔合理冇比，買樓講緣份，只有炒家瘋搶先造成呢啲惡例。簽過臨時合約後，會透過代書(專門負責地產的法律人士)處理文件。

甜

香港買唔到的，台灣可以比你十倍奉還，港幣五百萬只買到元朗套房，台幣五百萬可以買到三層樓連車位，仲有大量儲物空間、小庭園、露台、天台、開放式中島廚房、兩三間廁所、家庭影院...

發揮創意，庭園變成溫室花園，天台變成觀星玻璃屋，浪漫啊!

投資移民者，不妨前舖後居，地下開舖(一樓作為店面)，獅子山下。

放假渣車兩三個鐘到其他城市行街或郊外露營，完全國外生活。

逢年過節，好鄰居念你外地人，都會送啲土產比你，外遊時會幫忙淋花。

苦

兩三層樓，每層七八百尺，仲有樓梯，執屋攰死。

一樓就係地面，蛇蟲鼠蟻難免，仲有濕氣，好易發霉，要成日抽濕。

天台就似住頂樓，日頭熱爆，落雨漏水，防漏會成為業主一生志業。

經驗之談

台灣係傳統華人社會，即係多三姑六婆(雞婆)周圍講八卦，佢地講乜唔駛上心。但要小心果啲成日同你講隔離鄰舍要互相(遷就)，呢亭就係想攞你著數，例如停架車擺啲野去你門口，話一下下(一陣)，結果變成日日。你裝修時小則話你嘈親佢，大則話你整到佢間屋(舊樓邊有完美)，屈你幫佢裝修埋，如果真係唔關自己事，企硬反面就得。佢搵差佬都冇用，呢度差佬出名懶，真係有証據惡意損害(刑事)先會理下。

轉自爆怨公社