※1.河洛語演講稿。為五王國小 展同學 擬撰
※2.但願我這稿子別毀了小朋友的比賽
各位評審老師，在場兮好朋友，逐(tak)家好，逐家無煩惱。
我是第囗號囗囗囗，今仔日兮演講比賽，我要(beh；必，要也)講兮題目是：『阮學校兮圖書館』。『阮學校兮圖書館』。
自我去阮學校讀冊開始，就聽到老師咧講：「學校兮圖書館眞好，內面兮冊有幾若千本，逐家會當去借來看。」伊擱講：「冊看愈濟，頭殼會愈巧！」 敢有影？是不是【閻羅王咧變魔術--騙鬼】？不管，我先來去跫跫吔。
哇，圖書館眞正是大間，若親像別庄，內底媠佮(kah)未輸是皇宮。哇，大部分兮物件攏是新吔，塗跤鋪地板，嘛有膨椅予(hou)儂坐，內面兮冊比書局兮.擱較濟。尤其是遐兮故事冊，遐爾大字，圖擱畫著媠，我愛佮(kah)要(beh；必，要也)死。所以，以後，三不五時，我就走去圖書館趖(sô)來趖去，看會使挖⋯⋯著啥物寶貝無。
不是臭屁。我感覺真光榮，阮學校兮圖書館有夠氣派，毋過，傷（siunn；傷，極也）重要兮是，內面清氣，擱未攪吵(kiáu-tshá)，坐佇內面，予人心涼脾肚開。
若佇咧中晝，食飽了後，我會去給管理兮阿姨借一兩本啊冊，揀佇窗仔門邊，恬(tiām)恬啊坐落來，好好結(kah；結，和也)古早儂相八(pat；八，識也)一下。若準忝(thiám)的時陣，越頭，左手爿看，擱會使看著窗仔外兮風景，予儂歸身軀.精神攏輕鬆起來。
真心適，早前有同學若聽著「讀冊」這兩字，就一粒頭兩粒大，怨嘆：「讀冊、讀冊，愈讀愈慼（tsheh）」。但是，圖書館兮阿姨煞來宣傳：「讀冊啊毋是干單（kan-tann；只有也）讀課本爾，有閒，來去圖書館，讀家己有合意的冊，逐家就會感覺讀册若親像【老鼠洗身軀--有鼠味】囉！」經過阿姨兮苦勸結(kah；結，和也)姑晟，現此時，學校兮圖書館內面.借冊結(kah)看冊兮儂已經是瀧瀧滾啊。
其實，我八(bat；曾經也)聽阿叔咧講：「學校兮心臟是圖書館，心臟愛予跳，才未死翹翹。」加讀寡仔冊，會予(hou)人八禮數，添智慧，者(tse；這也)實在是足(tsiok)重要。若無，儂就會空空，吃老，就未成樣。是啦，我嘛認為圖書館是智識兮寶庫，每一個儂攏應該時常去行踏，好好啊利用，頭殼才會活靈靈。
我的演講到遮(tsia；這也)結束，感謝逐家聽我講，請逐家多多指導結(kah；結，和也)鼓勵，勞(lou)力！＃
|
字體：小 中 大
